Sakari, Aimo. Poésies du troubadour Guillem de Saint-Didier. Helsinki: Société Néophilologique, 1956.

Code: 234,015a Auteur: Guilhem de Saint Leidier Genre: Planh Numero: X

Lo plus iraz remaing d'autres chatius

I	1	Lo plus iraz remaing d'autres chatius,
		Penrai comjat de joi e de chansos:
		Amics Badocs, bels compainhs amoros,
		Per vostra mort metrai e nonchaler
	5	Joi e solatz e alegrar e chan;
		E can de vos dic ren mas en ploran,
		Tuta gens, cuit, m'o dei' a mal tener.
II		Ai! douz compaings, viaz vai vostre brius!
		Eu remaing sai marriz e consiros,
	10	Teing me per sols ab autres compagnos.
		Sabri' eu doncx, ses vos, solaz aver?
		Non ieu, per Crist, ans vos pliu, ses engan,
		Que, s'eu saubes per un li mort se·n van,
		Los vius laissera per vos a veszer.
III	15	Ja·m diziaz, Badocs, quant eraz vius:
		Quals que primers moris se d'ambedos
		Parles ab l'autr'. O ja tengr'eu a vos!
		Cossi·us en poc morz ni alres tener
		Quar no·m sones quant vos vic en somjan?
	20	Ja·us soner' eu! Er ai dit fallir gran:
		Amix, ben sai: vos no·n aves poder.
IV		Francx cavalers, pros e nominatius,
		Savis e fols, humils et orgoilos,
		Car se metens, e creissens e ghastos —
	25	Q'anc hom ves prez tant vil non tenc aver —
		De cortes ja fos flors, al mieu senblan,
		Ricx de bos aibs, qu'anc nuls hom no·n ac tan;
		Greu seira mais hom del vostre valer.
V		Bels Signier Dieus, Reys glorios e pius,
	30	Per Te meszeis mercejans, piatos,
		Reys de merce, al fort jorn perilhos
		Laissa nos ambs en paradis vezer:
		Mal o faran sains Peir' e sains Johan
		Si·l no meton lai on li·angeil estan,
	35	C'anc tan cortes non tengron en poder.
		a1
I	1	Pois majer [l. major] dol ai qe autre chaitiu
		Penrai comjat de joi e de chanzos:
		Amics Badocs, bels compainz amoros,
		Per vostra mort metrai a nonchaler
	5	Ris e deport et aleg[r]ier e chan.
		E qant de vos dic re mas en ploran,
		Tota genz, cuig, m'o dei a mal tener.
II		Ai, douz compaing, com tost vai vostre brui (l. briu)!
		Eu remaing sai marritz e consiros.
	10	Teing me per sols ab autres compagnios.
		Sabri'eu donc ses vos solatz aver?
		Eu non, per crist, anz vos plui [l. pliu] senz enjan
		Qe, s'eu saubes li mort lai on s'en van,
		Los vius laisera totz per vos vezer.
III	15	Jam dizias, Badocs, can sias viu:
		Lo qals primers mori ges de nos dos
		Tornes a l'autre. Aital tengr'ieu a vos!
		Coissi vos pot mortz ni alre tene
		Qe non sonest qan vos vi en sogniam?
	20	Ja·us soner'eu. Er, crei, dig un fail gran:
		Amics, ben sai qe no·n avetz poder.
IV		Franc caualier, pros e nominatiu,
		Savis e fols, humils et orgoillos,
		Larc e metent, e creissent e gastos —
	25	C'anc hom, per prez, plus vil non tenc aver —
		De cortezia flors, al meu semblan,
		Rics de bos aibs c'anc nuls hom no·n ac tan.
		Grieu sera mai hom del vostre valer.