Bertoni, Giulio. Un sirventese di Guilhem Figueira. "Zeitschrift für romanische Philologie", 35 (1911), pp. 489-491.

Code: 217,004 Auteur: Guilhem Figueira Genre: Sirventes Numero: -

Ja de far un sirventes

I	1	Ja de far un sirventes
		No·m cal aver ensegnador,
		Q’ieu ai tant vist et apres
		Ben e mal e sen e folor
	5	E conosc hanta et honor
		E blasme conosc e lauzor
		E conosc qe malvatz labor
		Fan Lombart a l'Emperador.
II		Car no·l tegnon per segnor
	10	Enaissi con deurion far,
		E s'el non torna vas lor
		Em brieu per sa ancta veniar,
		L'emperis s'en poira clamar
		D'el e del sieu emperiar,
	15	S'el laissa perdre ni mermar
		Lo dreg q'el deu adrechurar.
III		Pero s'el si vol veniar
		Haia bon cor e ferm e san
		E larc e franc en donar.
	20	Aizo·lh don per conseil certan,
		Qe·l repprocher ai dig de plan:
		Qe cel qi ha assatz del pan
		Enanz en deu donar al can
		Qe·l morda ni·l manduc la man.
IV	25	E s'el enaissi reman
		Qe non demant zo q'om li tol,
		Ia de ric pretz sobeiran
		Non aura tant con aver sol.
		Donc a l'arcson estreng l'acol,
	30	Q'aitant aug dir a mon aiol
		Qe tan qi non dona qe dol,
		Maintas vez non pren zo qe vol.
V		Qui trop soiorna ni col
		Lai on [per dreit] deu perchassar
	35	Sos pros, . . . . . . . . al sol
		. . . leu pot trabuchar;
		Pero non deu trop nuaillos
		Esser qant es d'obrar sazos
		Qe sabers es thesaurs rescos
	40	A cel qe rescos non es bos.
VI		Emperaire poderos
		A tan de sen e de saber
		Qe s'el torna sai vas nos,
		Apoderat ha son poder;
	45	Ja nuls non s'auzara mover,
		Qe non fassa tot son plazer;
		E prec Dieu qe m'o lais vezer
		Al mieu pro e al sieu voler.