Bertoni, Giulio. Un descort d'Albertet de Sisteron. "Annales du Midi", 15 (1903), pp. 493-497.

Code: 016,007a Auteur: Albertet Genre: Descort Numero: -

Bel m'es oimais

I	1	Bel m'es oimais
		ab la douza sazon gaia
		qe sia gais
		e q'un gai descort retraia,
	5	c'uns iois verais
		m'alegra·l cor et apaia,
		qi·m ven e nais
		de lei cui ioi e ben aia.
II		Per q'eu voil faire
	10	e dir e retraire,
		si com fis amaire,
		tot quant a lei plaia ;
		c'al meu veiaire
		bell'e de bonaire
	15	es, e no·il platz gaire
		avols gentz savaia ;
		ni lauzeniaire
		vilan[s] mal parlaire
		no pot dir ni braire :
	20	es de null repaire.
		. . . . . . . . . . . . . . .
		. . . . . . . . . . . . . . .
		Tal ioi don m'esclaire
		voilla Dieu[s] q'eu n'aia :
III	25	q'e mos braz la tegna
		un ser a ma guiza
		e ver mi l'estregna
		tota nua ses camiza.
		Aquest ioi m'avegna,
	30	que tan l'ai enqiza
		e s'amar mi degna
		mout ai bon'amor conqiza.
IV		Q'ell'es valenz
		bell'e gai'e corteza,
	35	douc'e plazenz
		e de tot ben apreza
		e conoisent[z],
		per qe·i ai amor meza
		mas non es gent[z]
	40	l'amor[s] egal devisa.
V		Q'eu mor aman
		per lei tant la dezire,
		e il non blan
		mon mal ni mon martire,
	45	ni fai semblan
		que ren l'enueg ni·l tire,
		don sui ben fols q'eu i ai m'amor miza.
VI		Mas il o fai
		per essai,
	50	per semblanza ;
		e non partrai
		del seu plai
		m'esperanza ;
		anz l'atendrai
	55	tro qe n'ai'
		alegranza,
		car genzer es qe fos d'amor enqiza.
VII		... ten vai,
		descortz, lai
	60	e t'enanza
		al Marques gai,
		car el fai
		senz doptanza
		son pretz verai,
	65	de qe·m plai,
		e s'onranza
		a totz grazir d'Espagna tro q'en Franza.