Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 285,001=364,019 Auteur: Lanza Marques , Peire Vidal Genre: Échange de coblas Numero: I

Emperador avem de tal manera

I	1	Emperador avem de tal manera
		Que non a sen ni saber ni menbranza;
		Plus ibriacs no s'asec en chadera,
		Ni plus volpills no porta escut ni lanza,
	5	Ne plus avols non chaucet esperos,
		Ni plus malvaz no fez vers ni chanzos.
		Rens non es meinz, mas qe peiras non lanza.
II		Espaza voill que sus pel cap lo fera
		E darz d'acer voill qe·ill pertus la panza,
	10	E brocas voill, qe·il tragan la lumera.
		Pois li darem del vi, e’n luoc d'onranza
		Un viell capel d'escarlat ses cordos,
		E sa lanza sera uns loncs bastos.
		Pois poira anar segurs d'aqui en Franza.
III	15	[Lanza Marqes, paubresa e neschera
		Vos coichan fort, dolors e malananza:
		Et es com l'orbs qe pissa en la carrera
		Quant a perdut vergoingna e menbranza.
		Plus sovent venz chastels e domeios
	20	No fai veilla gallinas ni capos,
		E s'anc fos francs, ar es sers ses doptanza].