Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 334,001 Auteur: Peire de la Cavarana Genre: Sirventes Numero: II

D'un serventes faire

I	1	D'un serventes faire
		Es mos pessamenz,
		Qe·l pogues retraire
		Viatz e breumenz,
	5	Qe·l nostr'emperaire
		Aiosta granz genz.
		Lombart, be·us gardaz
		Que ia non siaz
		Peier qe compraz,
	10	Si ferm non estaz.
II		De son aver prendre
		No·us mostraz avars;
		Per vos far contendre
		Ja non er escars;
	15	Si·l vos fai pois rendre,
		L'avers er amars.
		Lombart, be·us gardaz, ecc.
III		De Pulla·us sovegna
		Dels valenz baros,
	20	Qu'il non an que pregna,
		For de lor maisos:
		Gardaz no'ndevegna
		Autretal de vos.
		Lombart, be·us gardaz, ecc.
IV	25	La gent d'Alemagna
		Non voillaz amar
		Ni ia sa compaigna
		No·us plaza usar,
		Car cor m'en fai laigna,
	30	Ab lor sargotar.
		Lombart, be·us gardaz, ecc.
V		Granoglas resembla
		En dir: «broder, guaz?»
		Lairan, quant s'asembla,
	35	Cum cans enrabiaz.
		No voillaz ia venga!
		De vos los loingnaz!
		Lombart, be·us gardaz, ecc.
VI		Deus gart Lombardia,
	40	Boloign'e Milans
		E lor compaignia,
		Brexa e Mantoans,
		C'us d'els sers non sia,
		E·ls bos Marquesans.
	45	Lombart, be·us gardaz, ecc.
VII		Deus sal en Sardegna
		Mon Malgrat-de-toz,
		Car genz viu e regna
		E val sobre toz;
	50	C’us tant larcs no·s segna
		De neguna voz.
		Lombart, be·us gardaz, ecc.
VIII		Saill d'Agaiz, be·m plaz
		Car tant gent regnaz,
	55	Verones honraz,
		E si ferm estaz.
		Lombart, be·us gardaz, ecc.