Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 281,001 Auteur: Lamberti di Buvalel Genre: Canso Numero: IV

Al cor m'estai l’amoros desiriers

I	1	Al cor m'estai l’amoros desiriers
		Que m'aleuia la gran dolor q'ieu sen,
		Et estai si dedinz tant doussamen
		Que mais no·i pot intrar autre penssiers,
	5	Per que m'es douz lo mals e plazentiers,
		Que per so lais tot autre pensamen,
		E non pens d'als mas d'amar finamen
		E de faire gais sonetz e leugiers.
II		Pero no·m fai chantar flors ni rosiers
	10	Ni erba vertz ni fuoilla d'aiguilen,
		Mas sol amors qe·m ten lo cor iauzen
		Que sobre totz amadors sui sobriers
		D'amar celliei cui sui totz domengiers;
		Ni de ren als non ai cor ni talen,
	15	Mas de servir son gen cors avinen
		Gai et adreich on es mos cossiriers.
III		Prions sospirs e loncs cossirs d'esmai
		M'a mes al cor la bella en cui m'enten,
		Mas s'il saubes cum m'auci malamen
	20	Lo mals d'amor e la pena q'ieu trai,
		Tant es valens e de fin pretz verai
		E tant si fai lauzar a tota gen,
		Q'ieu cre n'agra merce, mon escien,
		Qu'il es la flors de las meillors qu'ieu sai.
IV	25	A Dieu coman la terra on ill estai
		E·l douz pays, on nasquet, eissamen
		E sa valor e son gen cors plazen,
		On tant grans bes e tanta beutatz iai,
		Q'ieu tant desir. Dieus, coras la veirai!
	30	Don tals doussors inz al cor me dissen,
		Qe·m ten lo cor fresc e gai e rizen,
		Q'on q'ieu estei, ades conssir de lai.
V		Qan me cossir son rie pretz cabalos
		E ben remir son gen cors covinen,
	35	Gai et adreich, cortes e conoissen
		E·l douz esgart e las bellas faissos,
		No·m meraveill s'ieu en sui enveios;
		Anz es ben dreitz qu'eu l'am per tal coven
		Cum de servir e d'amar leialmen
	40	E son ric pretz retraire en mas chanssos.
VI		Qan mi soven dels bels digz amoros
		E de·ls plazers qe·m saubetz dir tant gen,
		Bella dompna, cui hom sui veramen,
		Granz esfortz fi quant me loigniei de vos,
	45	Qu'eu degra estar totz temps de genoillos
		A vostres pes tro que fos franchamen,
		S'eser pogues, per vostre mandamen,
		Bon'amistatz mesclada entre nos dos.
VII		Bona dompna, si mal parlier ianglos
	50	Nuil destorbier volon metre entre nos,
		No n'aion ia poder a lor viven,
		Q'ie·us amarai totz temps celadamen,
		Et on q'ieu an, mos cors reman ab vos.
VIII		Biatritz d'Est, la mieiller etz c'anc fos,
	55	E ia Dieus noca·m sal s'ieu de ren men,
		Qu'el mon non cre qe n'aia tant valen,
		Qui vol gardar totas bonas razos.