Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 281,003 Auteur: Lamberti di Buvalel Genre: Canso, salut d'amor Numero: X

D'un saluz me voill entremetre

I	1	D'un saluz me voill entremetre
		Tal que a midonz sapcha dir
		Tot mon talan e mon desir
		E·l ben e·l mal mescladamen
	5	Q'eu n'ai e·l ioi e·l pessamen;
		Car eu sai ben, s'ill o saubes
		Con l’am senz cor galiador,
		Que·m penria per servidor
		Sivals, o n'auria merces.
II	10	E puois anar n'i puos, per letre
		Li voill mandar, qe sovenir
		Li deuria del gent servir
		Q'ai faich e faz de bon talen;
		E dobl’ades mon pessamen
	15	De lei servir, si m'aiut fes;
		Ni no vi anc nul amador
		Qui fos tant leials vers amor;
		Qu'eu am e ges non trob merces.
III		No·m poiria midonz demetre
	20	Per nulz mesfaitz so·il puos plevir,
		Car anc vers lei no·m vit faillir,
		Se trop amar n'es faillimen.
		Si·n trai fin'amor a garen,
		E se lo ver dir en volgues,
	25	Ben sai qe·m fora valedor
		Lo genz cors gais de la genchor
		A cui fos anc clamat merces.
IV		Per que mi plaz saluz trametre
		A Mon Restaur que sap grazir
	30	Toz los bos faiz et enantir
		Son pretz ab ric captenemen:
		Com pogra donc far faillimen
		Ves mi qu'el seu servir sui mes?
		Non sai ni d'aicho n'ai temor,
	35	Car tant i a sen e valor
		Per q'eu dei ben trobar merces.
V		Mon cor non puosc aillors ametre,
		Ni no·m puosc ges de leis partir.
		Que farai donc? Tot dei soffrir
		Pena e trebaill cubertamen,
		Tant que merce e chausimen
		En prenda·l seus cors ben apres,
		Qui es gencer q'en mirador
		Se mir. S'ab merce no·m socor,
		Ben cuit qu'el mon non es merces.
VI		Car qui es leials servidor
		De bon cor envers son seignor,
		Deu ben per dreit trobar merces.