Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 352,001 Auteur: Peire de la Mula Genre: Deux coblas avec tornada Numero: XI

Dels ioglars servir mi laisse

I	1	Dels ioglars servir mi laisse.
		Seignor, auiatz per que ni com:
		Car lor enois creis e poia,
		E qui mais los serv mescaba;
	5	Car cel que meins valra que tut
		Vol c'om per meillor lo teigna;
		E son ia tant pel mon cregut,
		Que mais son que lebret menut.
II		Lor affars cuich que abaisse,
	10	Car ill son plus pesan que plom
		Et es en mais que de ploia;
		Per q'ieu non pretz una raba
		Lor mal dir, anz cre que m'aiut,
		E vuoill q'alz baros soveigna
	15	C’aisi teing eu lor pretz cregut
		S'il son d'avol gen mal volgut.