Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 352,002 Auteur: Peire de la Mula Genre: Sirventes Numero: XIII

Ia de razon no·m cal metr'en pantais

I	1	Ia de razon no·m cal metr'en pantais
		Qan ben vuoill far un sirventes o dos;
		Qe·ill ric ioven per cui malvestatz nais
		M'o enseignon, que son cazut d'aut ios,
	5	E no me·n val chastiars ni pregieira
		C’om no los trob ades descomunals;
		E qui en cent en trobes dos cabals,
		Garir pogra·m, si fos d'aital manieira.
II		Ric ioven croi, pois vezetz que val mais
	10	Dars que teners, mout i faitz q'enoios
		Car etz aissi avar ni cobeitos;
		Q'u non i a q'a la fin tot non lais
		Ni que ia·n port mas una sarpeillieira;
		Mas d'una ren vos remembre sivals,
	15	Q'aqui non val ni thesaurs ni captals,
		Tors ni chastels, palaitz ni argentieira.
III		Per dar conquis Alixandres Roais,
		E per tener perdet Daires lo ros
		La batailla, que teners li sostrais,
	20	Sa gen li fetz laissar e sos baros.
		E per donar conquis Carles Baivieira,
		E per tener fo mortz Androine·l fals:
		C’anc per donar a princes no venc mals,
		Mas per tener lor nais dans e paubrieira.