Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 344,005 et 457,028 Auteur: Peire Guilhem de Luserna , Uc de Sant Circ Genre: Deux coblas avec deux tornadas (et réponse) Numero: XXIII

Qi na Cuniça guerreia / Peire Guillem de Luserna

		I
		Peire Guielm
I	1	Qi na Cuniça guerreia
		Per orgoill ni per enveia
		Foldat gran
		Fai, car sa beltatz resplan
	5	E sos ricx prez seignoreia,
		E taing se qe far o deia,
		So vos man.
		Per qe m'aura derenan
		Servidor, e si desreia
	10	Negus vas lei ni felneia,
		De mon bran
		Sabra si tailla ni·s pleia.
II		E qi·ll mou guerra ni tenza,
		No·l cossel c'an an Proenza
	15	Dompneiar,
		Qe ben poiria semblar
		Folz e portar penedenza
		Per la soa malvolenza,
		Don m'anpar.
	20	Pero de Luserna·s gar,
		C’orgoillz ni desconoissenza
		No·i troban luec ni guirenza,
		Qu'il affar
		De lai son tuit de plasenza.
III	25	Mesura e conoissenza
		Deu retener per semenza
		Qi regnar
		Vol ab bella captenenza.
		II
		N'Uc de Sain Si[r]c
I	1	[P]eire Guillem de Luserna,
		Nos digatz com sa luserna
		De prez zai!
		Car de na Cuniça sai
	5	Qez ill fez ogan tal terna
		Per q'ill perdet vita eterna,
		Don ia mai
		No deu viure ses esmai;
		E dompna, pos lait desterna
	10	Ni fai saut dont hom l'esqerna,
		Non assai
		Mal null mege de Salerna.
II		Ben sai qe vostres branz talla,
		Mas s'a totz cels fai batailla
	15	Q'en diran
		Mal o qe no l'esdiran
		Qez ill no fezes gran falla,
		Anc el val de Roncisvalla
		No ac tan
	20	Colp donat. Ar pauz ab tan
		E met la en no me·n calla.
		Lai fos ill on a lieis valla!
		Derenan
		No voill mais ab lei baralla.
III	25	Mesura vol c'om no salla
		Tant enan
		Per c'om sa umbra trasalla.