Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 344,004 Auteur: Peire Guilhem de Luserna Genre: Sirventes Numero: XXIV

No·m fai chantar amors ni drudaria

I	1	No·m fai chantar amors ni drudaria,
		Ni·m fai chantar flors ni foillas ni bruz
		Que fan l'auzel, ni per cho no seria
		Plus chantaire, tan ni qan, ni plus muz;
	5	Qu'atressi chan, quant l'ivers es venguz,
		Cum fas la'stat ni la Pasca floria
		Qan chans mi plai, ni razos lo m'aduz.
II		Molt m'abellis qui m'a bella paria,
		Quant venc en loc o no sui conoguz,
	10	Ne qui m'enqer, en dreit de cortesia,
		De qal part sui repairaz ni moguz;
		Car demandan es hom reconoguz
		E responden, per q'es razos q'om sia
		De bels respos als granz e als menuz.
III	15	Et es bels senz quant hom sap gen respondre
		A totas genz, segon que chascus es;
		Car lo savis n'aura talan que·us n'ondre,
		Si de respondre·us troba ben apres;
		E s'al nesci, q'er pecs e malapres,
	20	Non respondez, greu er q'el no·us deshondre
		De paraulas o de faiz, se locs n'es.
IV		Aitant vos voill de mon plazer despondre,
		Qu'a mi plaz mais us sofraitos cortes,
		Que del seu pauc sap servir e semondre,
	25	Lai on s'eschai, segon qe·l poders es,
		C’us rics malvaz, a cui soffraing merces,
		Tant q'om non pot del seu raire ni tondre;
		Q'anc de tal ric no·m pacgei iorn ni mes.
V		Ni·m pac d'amor ni de son seignoratge,
	30	Car en la fin fai toz sos servidors
		Clamar de si, tant es de mal usatge;
		Per q'eu non voill sos mals ni sas dolors;
		E lais me Deus mon meilz trobar aillors,
		E·m don tal ioi qe·m torn en alegratge,
	35	Que·l iois d'amor torn'en plainz et en plors.
VI		Si tot no·m platz ni m'abelis amors,
		Ioys e solatz mi platz e mon coratge,
		E plazon mi tuit silh cui platz honors.