Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 344,001 Auteur: Peire Guilhem de Luserna Genre: Chanson religieuse Numero: XXV

Ai, Vergena, en cui ai m'entendenza!

I	1	Ai, Vergena, en cui ai m'entendenza!
		E s'a vos plaz los mieus cars precs auzir,
		Iamais de ioi entier no·m cal marrir,
		Car vius e morz aurai ioi ses faillenza
	5	De vos, Dompna, que das ioi per iasse,
		Que·us ven de Sel, c'a en poder e te
		Los bes e·ls mals e·ls iois e·ls conseriers;
		Per qu'er en vos servir toz mos mestiers:
		C'autre servirs, en dreg vos, no m'agenza.
II	10	Valenz dompna sobre tota valenza,
		Vos pot hom ben lauzar ses contradir;
		E'n vos lauzar non pot nuls hom mentir,
		Car flors vos es de vera conoissenza,
		Flors de beutat, flors de vera merce
	15	Flors a cui·l mons . . . . . . . . . . .
		. . . . . . . . . . . . . . fon donatz, iois entiers.
		Can venc en vos lo rics Reis drechuriers,
		En romazest verg'apres la naissenza.
III		Vos aguest frug, dompn', ab menz de semenza,
	20	Que toz bos frutz fai foillar e florir,
		E·ls fai granar et a lor temps venir,
		Frug c'om conqer ab vera penedenza,
		Ab deiunar et ab orar ganre,
		Ab caritat, que taing c'om ai'en se,
	25	Car caritaz es via e sendiers
		C’adui home a Dieu, qu'es fruz pleniers,
		E nos conqer, menz de ferma creçenza.
IV		Ben sai, dompna, qui·us a en sovinenza
		E de ben cor si don'a vos servir,
	30	Si mezeis serv, car sertz es del iauzir;
		E ges non l'er tornaz e nonchalenza
		Sos servizis, vos en sovenra be,
		Lai on chascus aura paor de se,
		Aissi lo iusts co·l lair'e l'estradiers,
	35	Can si fara lo iuiamenz derriers,
		On nuls plaides non trobara guirenza.
V		Bona dompna, tant es granz la temenza
		Que n'ai, can pes c'aissi m'an fag faillir
		Miei fol voler, ab pensar et ab dir,
	40	Ab nesis fatz et ab folla parvenza,
		C’a penas pusc ni aus clamar merce.
		Vostres cars fils pero cant me·n sove
		Com'a Longi fon de perdon leugiers
		E al lairon, son de preiar frontiers,
	45	E non per tan c'ades temors no·m venza.
VI		A, Reina complida de tot be,
		Preiatz, si·us plaz, vostre car fil de me,
		Que m'aleuge mos mals e·ls conseriers
		Qu'eu trairai lai tan greus e tan sobriers,
		Qu'en dreg lo cors, la morz no·m fai temenza.