Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Introduction
* Vocabulaire

* Présentation
* Bibliographie
* Témoignage
* Appareil critique
* Notes
* Traductions
* Images

Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 437,001 Auteur: Sordel Genre: Canso Numero: XXVIII

Ailas, e que·m fau miey huelh

   
Ailas, e que·m fau miey huelh,
    Quar no vezon so qu'ieu vuelh?
     
I
 
Er quan renovella e gensa
   
Estius ab fuelh'et ab flor,
 
5
Pus mi fai precx, ni l'agensa
   
Qu'ieu chant e·m lais de dolor,
   
Silh qu'es donna de plazensa,
   
Chantarai, si tot d'amor
   
Muer, quar l'am tan ses falhensa,
 
10
E pauc vey lieys qu'ieu azor.
   
Ailas, e que·m fau miey huelh,
    Quar no vezon so qu'ieu vuelh?
     
II
 
Si tot amors mi turmenta
   
Ni m'auci, non o planc re,
 
15
Qu'almens muer per la pus genta,
   
Per qu'ieu prenc lo mal pe·l be.
   
Ab que·l plassa e·m cossenta
   
Qu'ieu de lieys esper merce,
   
Ja, per nulh maltrag qu'ieu senta,
 
20
Non auzira clam de me.
   
Ailas, e que·m fau mey huelh
    Quar no vezon so qu'ieu vuelh?
     
III
 
Mortz suy, si s'amor[s] no·m deynha,
   
Qu'ieu no vey ni·m puesc penssar
 
25
Ves on m'an ni·m vir ni·m tenha,
   
S'ilha·m vol de si lunhar;
   
Qu'autra no·m plai que·m retenha,
   
Ni lieys no·m puesc oblidar;
   
Ans ades, quon que m'en prenha,
 
30
La·m fai mielhs amors amar.
   
Ailas, e que·m fau miey huelh,
    Quar no vezon so qu'ieu vuelh?
     
IV
 
Ai, per que·m fai fan mal traire?
   
Qu'ilh sap be, de que m'es gen,
 
35
Qu'el sieu pretz dir e retraire
   
Sui plus sieus on piegz en pren;
   
Qu'elha·m pot far o desfaire
   
Cum lo sieu, no li·m defen;
   
Ni de lieys no·m vuelh estraire,
 
40
Si be·m fai morir viven,
   
Ailas, e que·m fau miey huelh?
    Quar no vezon so qu'ieu vuelh?
     
V
 
Chantan prec ma douss'amia,
   
Si·l plai, no m'auci'a tort,
 
45
Que, s'ilh sap que pechat[z] sia,
   
Pentra se·n quan m'aura mort;
   
Empero morir volria
   
Mas que viure ses conort,
   
Quar pietz trai que si moria
 
50
Qui pauc ve so qu'ama fort.
   
Ailas, e que·m fau mey huelh,
    Quar no vezon so qu'ieu vuelh?

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI