Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 371,001 Auteur: Perseval Doria Genre: Sirventes Numero: XXXI

Felon cor ai et enic

I	1	Felon cor ai et enic,
		Car vei tric
		Poiar e prez perdre abric,
		Si qe a pauc de ioi no·m gic;
	5	Mas per dar mal e genzic
		A cui non platz s'ai ioi ric,
		Cantarai e mala vic
		Qui no vol guerra e destric,
		Per c'om conois ferm amic.
II	10	Pero be·m platz qe·l temps francs
		Fai los brancs
		Dels arbres vermeils e blancs;
		E am guerra qi·ls estancs
		D'aver fa·n remaner mancs,
	15	E·m plaz can vei sobrels bancs
		Aur et argen, co fos fancs,
		Per dar als pros ses cors rancs
		C’amon suffrir colps els flancs.
III		E am can vei l'estandart
	20	A sa part
		E·il pros cavalier gaiart
		Gardon c'us no se·n depart,
		E·il vil recrezen coart
		Van qeren eniein e art
	25	De fugir e an regart
		Can volon lanzas e dart
		E la terra'nviron art.
IV		Trompas, tanbor e sonaill,
		Cant hom saill
	30	Als castels pres del murail,
		M'agradon e per terrail
		Venon peiras c'us no faill
		. . . . . . . . . . . . . . . . . .
		E·il pic son vengut e·il maill
	35	Ab qe·il pros loin de nuaill
		Rompon portas ab trebaill.
V		Mas Engles si van vanan
		Q'ill venran
		E l’Emperi enqerran.
	40	En Espagn'a pro d'afan,
		Qe·il Serrazi no·il rendran
		Per lur Granada ugan,
		Qe·il rei no·n fan nul deman,
		Anz prendo·n mescap e dan,
	45	De q'om los va fort blasman.
VI		Pero pretz fora perdutz,
		Mas vertutz
		Fai nostre reis, q'encar lutz,
		Manfrei, q'es de fin pretz lutz,
	50	Qe anc no fon recrezutz
		De donar ni esperdutz
		Per guerra, anz a vencutz
		Sos guerriers et abatutz
		E sos amics aut cregutz.
VII	55	Et en Mieils-d'amor m'aferm
		Ab cor ferm
		De pretz, per qu'eu no·m desferm
		D'amar leis, anz me·n referm,
		E car non a cor enferm
	60	Creis en ioi e d'esmai merm.
		. . . . . . . . . . . . . . . . . . .
		. . . . . . . . . . . . . . . . . . .
		. . . . . . . . . . . . . . . . . . .
VIII		Domna, Deu prec qe·us referm
	65	Vostre fin pretz e·us aferm
		La gran beutat e·l cor ferm
		C’avetz vas me, qe no·s merm.
IX		Reis Matfrei, pretz vos ten ferm
		E Deus en a fag conferm.