Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 282,016 Auteur: Lanfranc Cigala Genre: Canso Numero: XXXV

Non sai si·m chant, pero eu n'ai voler

I	1	Non sai si·m chant, pero eu n'ai voler,
		Mas, segon dreg, non n'auri' eu talen,
		Q'a chantar taing q'om aia iausimen
		Et eu non l'ai; ni·m voil pero tener
	5	De far chanson, qe ben leu ia garria
		Del mal d'amor, q'eu tem fort que m'aucia,
		Que chanz adus gran ben maintas sazos.
		Eu no·l n'esper, tant en soi desiros,
		Mas chantar voil, qu'eu n'ai conort aital:
	10	Si chantz mi platz, no·m noz, si tot no·m val.
II		Eu mi cuiav'aver tant de saber
		E de vertut, que de l'afortimen
		D'amor pogues garir e ben e gen,
		Mas enganatz mi soi trobatz per ver,
	15	Que vencut m'a e·m ten en sa baillia;
		Pero ben dic que·il colpa non es mia,
		Anz es tota de mos fals compaingnos,
		Q'a guerrers ai·l cor e·ls oils amdos.
		E qui de for a guerrer dinz l'ostal,
	20	Non pot aver plag plus descomunal.
III		Qu'eu er aitals com selva de poder
		Anz que meu oil m'aguesson falsamen
		Traït per leis qe·m conquistet rizen,
		Q'esfors d'amor no·m chalia temer,
	25	Qe la selva lo fer non doptaria
		Si doncs lo fust[z] socors no li en fazia;
		Ni eu, Amors, non agra temsut vos
		Si no m'eron li meu contrarïos;
		Mas traït m'an li meu oill desleial,
	30	Con trai lo bosc lo fustz de la destral.
IV		Que vos intretz, Amors, per mon vezer
		Inz e mon cor e·l cors fes faillimen
		Que·us alberget ses cosseil de mon sen.
		Mas pos ill qet an fag vostre plazer,
	35	Fassatz lur ben, per vostra cortesia,
		Q'enaissi taing a bona seingnoria.
		De me no·us prec, sol qe fassatz ioios
		Aquetz trachors qe m'an fag enveios.
		E si·m meir grat del rei celestial,
	40	Qu'eu prec per cels qi·m fan enoi mortal.
V		Pero be·us aus, Amors, merce querer,
		Si tot sui vostr'un pauc forsadamen,
		Que no·m siatz tant blos ses chauzimen;
		Q'aisi con vos etz fortz per conquerer,
	45	Serai eu fortz, sia senz o folia,
		En vos servir, e mon sen, qe·m chastia,
		Oblidarai; ni no cre que anc fos
		Negus amans vas vos plus temeros,
		Mas ben sabes, qan de servir pren mal,
	50	Qe l’altra gens a paor d'atretal.
VI		Pero, Amors, car m'avez fait plazer
		De tot lo mon tota la plus plazen,
		D'aitan mi lau e·l sobreplus aten
		De vos, domna, car no·m deignatz valer...
	55	— Fals, si fas eu, car no·t vei qe no·t ria.
		— Vers es, mas eu dopti de tricharia.
		— No far, q'aiso t'es conortz avundos...
		— De qe? — Qe·l ris nais de cor amoros.
		— Hoc, ben, si·l ris mou de dompna leial.
	60	— Fols, tals soi eu, ni fatz semblan venal.
VII		Bona dompna, vostr'avinenz respos
		M'es tan plazens e m'a fag tan ioios,
		C’oblidat n'ai mon enoi e mon mal;
		Mas no·m tardez lo don, si Dieus vos sal.