Gambino, Francesca. Canzoni anonime di trovatori e "trobairitz". Alessandria: Edizioni dell'Orso, 2003.

Code: 461,177 Auteur: Anonyme Genre: Lamentation d'un lèpreux, Canso Numero: XV

Non puesc mudar non plainha ma rancura

I		Non puesc mudar non plainha ma rancura,
		seinher Austor, car est de mon estaie,
		car m’es camiat mon ioy e m’aventura,
		………………………………           [-aie]
	5	et ai perdut tot solas e deport,
		et ai perdut luy que sueill amar fort,
		et ai perdut la vostra compainhia:
		Mort, car non m’ausis, fas gran vilania.
II		Amixs n’Astor, fort m’es greus e salvaie,
	10	fort engoisos ez estrainh a suferre
		qu’ieu en Embiers aia pres ostalage;
		meravil mi car tot vieu no·m soterre
		o car non soy tan lueinh d’aquest pays
		ves calque part, que ia mais res no·m vis,
	15	vo sufrir m’er, vueilha o non qu’ieu sia,
		los mals qu’ieu trai tro que la mort m’ausia.
III		Qu’ieu am donnas sueill aver compainhia
		ez am clergues, am ient ben enseinhada,
		ar me soy mes, car non truop autra via,
	20	ab una res qu’es del segle triada;
		qu’ieu solïa portar solas am latz
		rauba d’estam, fos ivern o estatz,
		aras mi ven portar solas de vaca,
		ez estauc pres com fa ors a estaca.
IV	25	Qu’ieu solïa chantar per alegrage
		e per midons qu’ieu tant amar solia,
		mas aras chant e proe mon damnage;
		car ieu soy pres de tan gran malautia!
		A mi que cal, qu’ieu n’ai lo cor perdut?
	30	A Iezu Crist n’ai l’esperit rendut;
		Los mals qu’ieu trai e la grieu penedensa
		vuell tostens mais sufrir ez am temensa.