Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 282,023 Auteur: Lanfranc Cigala Genre: Chanson de croisade Numero: XLII

Si mos chanz fos de ioi ni de solatz

I	1	Si mos chanz fos de ioi ni de solatz
		E mais e miels sai que grazitz seria;
		Per qu'ieu en cor et en talant avia
		Chantar d'amor, mas er me·n sui laissatz
	5	Car mal chanta de gaug qui·es iratz;
		E pero vir mon chantar en clamors,
		E·m meravil cum nuls hom ab ioi regna,
		Que lei ni fe de crestiantat tegna;
		C’auzir pot hom los critz e·ls braitz e·ls plors
	10	Del sepulcre e non troba secors.
II		Jerusalems es luecs desamparatz.
		Sabes per que? Car la patz es faillia,
		C’aitan vol dir, per drech'alegoria,
		Jerusalem com vizios de patz;
	15	Mas la guerra dels dos granz coronatz
		A cassada patz d'aqui e d'aillors,
		Ni de voler patz no fan entresegna.
		Eu non dic ges en cui colpa devegna;
		Mas qi mer mal d'aqetz dos granz segnors,
	20	Dieus lo meillor o l'aucia de cors!
III		Granz es lo dols e maier for'assatz
		Dels cavaliers qui son mort en Suria,
		Si no·ls agues Dieus pres en compaignia;
		Mas cels de sai no vei gair'encoratz
	25	De recobrar las saintas heretatz.
		Ai, cavallier, aves de mort paors!
		Eu crei si·l Turc fugisson de la'nsegna,
		O fosson tan com li corp de Sardegna,
		Q'il troberan a pro de cassadors;
	30	Mas qui no·s mou a pauc d'envazidors.
IV		Si·l Reis frances non fos aconseillatz
		D'aquest socors, meravilla n'auria,
		Tant l'a donat Dieus rica seignoria;
		Mas si·l deu far, fassa·l socors vivatz,
	35	Car perdutz es lo dos q'es trop tarzatz.
		E·l Reis engles aia cor de l'acors
		E del valen Rei Richart li sovegna,
		E pas la mar ab poder e no·s feingna,
		Car hom conois los amics feingnedors
	40	E los verais a las cochas maiors.
V		Dels Alamanz, s'eu fos lur amiratz,
		Tot passera la lor cavalaria;
		Ni·ls Espaignols ges non escuzaria,
		Si tot an pretz ves Sarrazis malvatz,
	45	Qar per aquels non fon ges derrocatz
		Lo Sepulchres on Dieus iac e·n ressors.
		Be·m meravil com hom de crotz si seigna
		Pos non a cor negus que la manteigna,
		E·m meravil don nais tanta errors,
	50	C’om non decern las antas dals honors.
VI		Coms Proensals, tost fora deliuratz
		Lo Sepulcres si vostra manentia
		Poges tan aut com lo pretz qui vos guia,
		Car amatz Dieu e bonas genz onratz
	55	E ses biais en totz afars reignatz
		E per vos es anqer viva valors;
		Mas del passar non ai cor que·us destregna,
		C’obs es qe sai vostra valors pro tegna
		A la gleiza d'aitals guerreiadors.
	60	Ja de lai mar non queiratz Turcs peiors!
VII		Apostoli, eu crei qe si conveigna
		Que fassatz patz o guerra qui pro teigna,
		Car si totz temps anatz per l'uzat cors,
		Per vos non er lo sainz Sepulcres sors.
VIII	65	Emperaire, del secors vos soveigna
		Car Dieus lo·us qier, per cui chascuns reis reigna,
		E fassatz patz de sai e lai socors,
		Car ben pot mortz sobrels emperadors.