Bertoni, Giulio. I trovatori d'Italia. Modena: Editore Cav. Umberto Orlandini, 1915. Code: 282,020 Auteur: Lanfranc Cigala Genre: Chanson de croisade Numero: XLIII Qan vei far bon fag plazentier I 1 Qan vei far bon fag plazentier, Mi platz far chantaret plazen, Non ies de las chiflas del ven, Car ieu no voill tan vil mestier 5 Q'en faitz menutz mos sabers si dechaia; Mas lo[s] cabals es razos q'ie·n retraia, Sivals per dir als avols zo qe·il pes E per plazer dels gais e dels cortes, E per onrar cels qui fan faigz onratz, 10 Quar qui ben fai taing qe·n sia lauzatz. II Per qe·m platz dir laus vertadier Chantan de tot home valen; Pero no·m cal gaire soven D'aital chant aver consir[i]er, 15 Tan trob'om paucs de cels cui valors plaia; Mas d'aquels paucs non es razos q'om taia Sos onratz faitz, per q'ieu non tairei ges Zo qes a fag l'onratz reis dels Frances, Car s'es primers per far socors crozatz 20 Al saint regne on Dieus fo mortz e natz. III Lau e pres e honor en mier Lo reis del bon comenzamen, Pero dels meillors si n'aten Q'om li fara lau plus entier. 25 Doncs zo c'a gent comenzat a cap traia, Car en la fin chant'om lauzor veraia, E pas de cors la mar, qe granz ops es, Que de lai son Crestian mort e pres E·l sepulcres fendutz e derocatz, 30 On Dieus pauzet can fon de crotz levatz. IV E sai son Cristian guerrier Entr'els et aqo mortalmen, E non an dol ni marrimen D'est'ainta ni d'est encombrier; 35 Pero si sai la guerra no s'apaia, Cristiantatz grieu sera qe non chaia. Sabes per que? Car el mon non es res Miels puesc'aucir autrui con el metes. Pero, si chai, dir puesc eu qe·m desplatz... 40 Mas non puesc mais, car poders no·m n'es datz. V Eu non teing ies per cavalier Qui non socor de bon talen O de son poder franchamen Dieu, pos el n'a tan gran mestier. 45 Lo rei frances lau qui par que cor n'aia, E los malvatz baros, cui qe desplaia, Repren q'a Dieu faillon zo q'an promes; Mas ies per nom no·ls voil aver repres; Qar s'ieu degues blasmar totz los malvatz, 50 Tart finera lo chantaretz q'eu fatz. VI Hom demanda tot iorn e qier A Dieu conseil e garimen Et el voluntiers nos enten, Mas ara, cant el nos requier, 55 Non es auzitz, de qe mos cors s'esmaia. Malvatz baron, cuidatz c'aisso s'eschaia Que Dieus vos vaill'e vos non l'aiudes? Ja sabetz vos q'en crotz fon per vos mes? No·us sai plus dir, mas s'ara no·us crozatz, 60 Pos pretz perdretz, qe la vida perdatz! VII Si no·us valetz, Seignor Deu, vos metes, Dels crois barons socors non esperes. Pero si mortz pren los baros malvatz, Socors n'auretz, car pois regnara patz.
Bertoni, Giulio. I trovatori d'Italia. Modena: Editore Cav. Umberto Orlandini, 1915.
Code: 282,020 Auteur: Lanfranc Cigala Genre: Chanson de croisade Numero: XLIII
Qan vei far bon fag plazentier
Institut d'Estudis Catalans. Carrer del Carme 47. 08001 Barcelona. Telèfon +34 932 701 620. Fax +34 932 701 180. informacio@iec.cat - Informació legal