Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 101,007 Auteur: Bonifaci Calvo Genre: Sirventes Numero: LXII

Ges no m'es greu s'eu non sui ren prezatz

I	1	Ges no m'es greu s'eu non sui ren prezatz
		Ni car tengutz entr'esta gen savaia
		Genoeza, ni·m platz ges s'amistatz,
		Car no·i cab hom a cui proeza plaia;
	5	Mas ab tot zo mi peza fort qu'il es
		Desacordanz, car s'il esser volgues
		En bon acort, sos granz poders leumen
		Sobraria totz cels per cui mal pren.
II		Hai, Genoes, on es l'autz pretz honratz
	10	Qu'aver soletz sobrel gen, que par qu'aia
		Totz vostres faitz decazutz e sobratz
		Tan fort que totz vostr'amics s'en esmaia?
		Sia·l descortz, qu'entre vos es, jos mes,
		E donatz vos luecs a tornar los fres
	15	En las bochas de cels que, per conten
		Qu'avetz mest vos, si van desconoissen.
III		Mas lo contenz es tant mest vos poiatz
		Que, s'el non chai, greu er que no·us dechaia;
		Qu'om vos guerreia, e vos vos guerreiatz;
	20	E qui vos venz, ar no·s cug que·l n'eschaia
		Laus ni bos pretz, car no·us platz vostre bes,
		Que l'us a gang quant a l'autr'es mal pres:
		Doncs qui venz tan descabdelada gen,
		Non fai esfortz don pueg em pretz valen.
IV	25	E si no fos la follors e·l peccatz
		Que nais del vostre descort, tals s'asaia
		Leumen a far zo que mais vos desplatz,
		Que·us for'aclis, car res tant non esglaia
		Vostres guerrers ni tant lor desplai ges
	30	Con faria·l vostr'acortz, s'el pogues
		Entre vos tant durar enteiramen
		Que poguessetz d'els penre veniamen.
V		Car il sabon que leger no·us donatz
		De vos veniar, mostron que lur desplaia
	35	Zo que pro vetz los avetz malmenatz,
		Tant que greu es luecs, on hom no·l retraia,
		Que trenta d'els non esperavon tres
		De vos, per c’ab pauc non es Dieus repres,
		Car de tal guiza vos a tout lo sen
	40	Que·us sobron cil que no valon nien.
VI		Venecian, ben sapchatz qu'obs vos es
		Que si'ab vos Dieus contrals Genoes,
		Car, ab tot zo qu'el vos hi val granmen,
		Vos an il tout tant qu'en vivetz dolen.