Bertoni, Giulio. I trovatori d'Italia. Modena: Editore Cav. Umberto Orlandini, 1915.

Code: 290,001 Auteur: Luquet Gatelus Genre: Sirventes Numero: LXIV

Cora q'eu fos marritz ni conziros

I	1	Cora q'eu fos marritz ni conziros
		Per dan de pretz qe chascus relinqia,
		Ara·m conort e son gais e ioios
		Car iois e pretz revendra qi·s perdia,
	5	Car lo pros Coms proenzals Lumbardia
		Voi conqerer et Toscas e Puilles,
		E d'autra part Conratz vol son paes
		E·l reis Matfre non s'i acorda mia,
		Per q'entrels faitz aura pretz sa bailia.
II	10	Se·l pros Coms vai segon q'es poderos,
		Un mirail ha, on mirar se deuria,
		E se·s mires els faitz del rei n'Anfos,
		Ben sai per cert qe tant non tardaria
		Zo q'a empres, qe laissar non poiria,
	15	S'el non laisses tot lo pres q'a conqes;
		Qe·l bruitz es tant vas totas partz estes,
		Q'o sabon ia de la mar en Suria
		E d'Espagna entro en Normandia.
III		Donc albir se, pois tals es lo rezos,
	20	Si se·n rema, tot zo q'om en diria;
		E membre li qe Carl ab sos baros
		Conques Puilla e n'ac la segnioria
		E dels granz faitz qe Franza far solia.
		Ara n'estan avol cor en defes;
	25	E pois lo noms de Carle en lui es
		Sega·ls seus faitz q'estiers a tort seria
		Per sel clamatz qe valc, s'el non valia.
IV		E se Conratz non es valenz e pros
		Deslignara, car li seu an Soria;
	30	Non era·l seu bastant, se plus no·i fos:
		Doncs se laissa so q'esser seu deuria.
		Fara semblant qe mal l'altrui tenria
		E si no·l ven recobrar demanes,
		Fara creire so qe·l reis diz espes:
	35	Q'el sia mortz e q'autr'el sieu luec sia,
		Qe s'el fos vius, lo sieu demandaria.
V		Se·l reis Matfres fos princeps coratios
		Ni zo qe te conqes per galiardia
		S'era o pert qant es reis, per un dos
	40	N'aura blasme, car mais de carestia
		Lo deu gardar com plus l'ac a fadia;
		Et als baros, ont ha tant del seu mes,
		Membre cal son ni eran ni con es;
		E penz chascuns de gardar noig e dia
	45	Zo q'ab autre segnor mais non auria.
VI		Bernart, apren e chanta·l sirventes
		E poiras dir, se·l cor no fail als tres,
		Qe·l iuecs sera entaulatz ses faillia;
		Mas tant o voil q'eu non crei qe ia sia.