Gambino, Francesca. Canzoni anonime di trovatori e "trobairitz". Alessandria: Edizioni dell'Orso, 2003.

Code: 461,174 Auteur: Anonyme Genre: Deux coblas avec tornada Numero: XVIII

N'Auriflama, car vos es flameians

I		N'Auriflama, car vos es flameians
		coma fin aur cant es ben aflamatz,
		en la flama ben flaman ni purgatz
		soy enflamans, e mon cors es flamans
	5	d'una flama flameian qu'es mot pura
		que flameia si con fay dauradura,
		la qual flama tot iorn creis e meilhura:
		n'Auriflama, vos es d'aital natura.
II		Vos est flama de fin aur reflamans,
	10	n'Auriflama, per qu'ieu soy enflamatz
		de tal flama don es mon cors dauratz,
		que coma l'aur lus, tant es reflamans;
		don flameia fuoc e flama tot dia
		per vostr'amor qu'emflama tan la mia,
	15	si qu'escantir la flama no·s poiria,
		tant soy de vos enflamatz, dous'amia.
III		Flama flamans ni flamier no·m poiria
		desemflamar, n'Auriflama yolia,
		de vostr'amor, ans mais m'enflamaria
	20	qui flamairar de flama me volria.