Gambino, Francesca. Canzoni anonime di trovatori e "trobairitz". Alessandria: Edizioni dell'Orso, 2003.

Code: 461,231 Auteur: Anonyme Genre: Deux coblas avec tornada Numero: XIX

Tan es tricer e deslials, Amor

I		Tan es tricer e deslials, Amor,
		e tan es fals e tan es truduan,
		plein de dolor, de suspir e d'afan,
		per c'om vos de ben apellar traizor;
	5	ch'in vos non es mais enian e bausia
		en fausitat, e mensons'e feunia,
		per ch'es raisons c'om vos deia maldir,
		ch'in vos non es mais enveia e desir.
II		Cel c'al prim[er] vos apella "Amor"
	10	non dis lo ver, segon lo meu senblan;
		anz fora meillz q'el agues diz enan
		lo nom verai, q'el augues diz "Dolor".
		Dolor siaz: qe Deu dolor vos dia
		e senz dolor non siaz mais un dia,
	15	e de dolor poscaz ab dol morir,
		char de dolor nascon nostre consir!
III		Ben es traï sel qi en vos se fia,
		e fas qe fol, se tost non s'en chastia;
		qe toz aman faiz enaisi languir:
	20	al foc arden devez per dreiz fenir.