Nicholson, Derek E. T. The Poems of the Troubadour Peire Rogier. Manchester: Manchester University Press, 1976.

Code: 356,008 Auteur: Peire Rogier Genre: Vers Numero: II

Tan no plou ni venta

I	1	Tan no plou ni venta,
		qu’ieu de chan non cossire;
		frei’aura dolenta
		no·m tolh chantar ni rire,
	5	qu’amors me capdelh’e·m te
		mon cor en fin joy natural,
		e·m pais e·m guid’e·m soste,
		qu’ieu non suy alegres per al
		ni alres no·m fai vivre.
II	10	Ma dompn’es manenta
		de so qu’ieu plus dezire;
		del donar m’es lenta,
		qu’anc no·n fuy may jauzire;
		ben sai que pauc l’en sove,
	15	e ges no·m part joc cominal,
		qu’ilh pensa petit de me,
		et ieu trac per lieys mal mortal,
		tal qu’a penas puesc vivre.
III		No trop qui·m guirenta
	20	ni qui m’o auze dire
		q’un’autra tan genta
		e·l mon se li ni·s mire;
		ni d’autra non s’esdeve,
		mas qu’om digua que re no val,
	25	qu’elha ditz e fai tan be,
		q’una contra lieys no sap sal;
		tal domna fai a vivre.
IV		Si s’en fenhon trenta,
		ges per so no·m n’ahire;
	30	cuy que·s vol si·s menta,
		qu’a mi·s denh’escondire;
		qu’adonc sai ieu ben e cre
		q’us non a dompna tan cabal,
		quan quecx la lauza per se,
	35	que s’el n’avia un’aital
		ben pogra ses lieys vivre.
V		Greu planh mal que·n senta
		drutz, quant es bos sufrire,
		qu’amors es valenta
	40	seluy que n’es jauzire;
		erguel no vol ni mante,
		ans qui lo·lh mostra, lieys non cal,
		que mais n’auri’ab merce
		en un jorn qu’en dos ans ab mal
	45	sel qu’ab erguelh vol vivre.
VI		Si uns s’i prezenta,
		que·l denh lonc se assire,
		ges no m’espaventa,
		qu’ab mi l’ai a devire,
	50	que dona, quant en pretz ye,
		deu aver fin cor e leyal;
		e non crezatz que·s malme
		contra son bon amic coral
		als dias qu’ay’a vivre.
VII	55	E s’il fai parventa
		que·l guinh ni·l huel lor vire,
		per so no·s guaimenta
		mos cors ni·s mand’aucire;
		que dompna fai manta re
	60	per que plass’a totz per engual,
		e quasqun cum li cove
		deu aculhir dins son ostal,
		s’ab gran bontat vol vivre.
VIII		Peir Rogier per bona fe
	65	tramet lo vers denant nadal
		a sidons que·l fai vivre.
IX		Clama li per gran merce
		qu’aprenda·l vers denant nadal,
		s’ab joy de lui vol vivre.