Nicholson, Derek E. T. The Poems of the Troubadour Peire Rogier. Manchester: Manchester University Press, 1976.

Code: 356,005 Auteur: Peire Rogier Genre: Vers Numero: IV

No sai don chant, e chantars plagra·m fort

I	1	No sai don chant, e chantars plagra·m fort,
		si saubes don, mas de re no·m sent be,
		et es greus chans, quant hom non sap de que.
		Mas adoncx par qu’om a natural sen,
	5	quan sap son dan ab gen passar suffiir,
		quar no·s deu hom per ben trop esjauzir,
		ni ia per mal hom trop no·s dezesper. —
II		Mas tot quant es s’aclina vas la mort:
		que prezas tu tot quan fas? Ieu non re. —
	10	Mas so ditz hom, qu’avols es qui·s recre,
		per qu’om deu far tot bel captenemen,
		que no·l puesc’hom mal dir ni escarnir;
		aisso dic ieu que no·s deu hom giquir
		aissi del tot qui·l segle vol tener.
III	15	Fort estai be qu’om chant e que·s deport. —
		Oc, quan n’es luecx ni temps que s’esdeve. —
		E quoras doncx? Vols o dir ges per me? —
		Sapchas qu’ieu hoc. — Quar us grans jois m’en pren? —
		Qar ditz totz jorns que rir vols e bordir;
	20	tol te d’aisso, ia t’er tost a murir. —
		E laissarai per so mon joy-aver?
IV		Si joy non ai, don aurai donex confort?
		E qual joy quiers? — De lieys cuy clam merce. —
		Folhs yest. — Per que? — Per Dieu trebalhas te,
	25	ni per aquo ... — Fai doncx! — Mas per nien
		t’en entremetz. — Tu que saps? — Aug lo dir. —
		Saps tu que? — Fai! — Laissa me tot guerir. —
		Ieu voluntiers, e fai tot ton plazer. —
V		Tost venra temps que conostra son tort. —
	30	Aqui t’aten. — Si fatz ieu per ma fe. —
		Fas ton talan, mas ieu no cug ni cre
		tan quan vivras n’ayas nulh jauzimen. —
		Non dis per als mas quar m’en vols partir. —
		Ieu hoc, per so quar no t’en vey jauzir. —
	35	E ia saps tu qu’als non ai en poder.
VI		Mos cors no·m ditz qu’ieu ab autra m’acort.
		Quar ben as dreg pel gran ben que t’en ve. —
		El’o fara. — E quoras? — Er dese. —
		Ben estara si vers es, mas si·t men,
	40	tu qu’en faras? — Am mai lo sieu mentir
		q’autra vertat. — Mal hi sabes cauzir,
		qu’ieu non pretz ren mesorgua contra ver. —
VII		Per s’amor viv, e s’amors m’a estort
		de la preizon, e s’amors m’a mes fre,
	45	que no·m eslays vas autra, si·m rete;
		e per s’amor ai tot mon cor jauzen,
		e·m part d’enueg, e·m platz quan puesc servir;
		e valon mais de lieys li lonc dezir
		que s’avia d’autra tot mon voler.
VIII	50	Lo vers tramet e vuelh que si prezen
		mon Tort-n’avetz, si·l play que·l denh auzir,
		que totz lo mons li deuri’obezir,
		qar mai que tot vol bon pretz mantener.
IX		E si dons Sanz m’ a fag descauzimen,
	55	mieus es lo dans et er lo·m a sofrir,
		et el no·s poc de plus envilanir,
		e per vilan lo deu hom ben tener.