Nicholson, Derek E. T. The Poems of the Troubadour Peire Rogier. Manchester: Manchester University Press, 1976.

Code: 356,003 Auteur: Peire Rogier Genre: Vers Numero: VII

Entr’ir’e joy m’an si devis

I	1	Entr’ir’e joy m’an si devis,
		qu’ira·m tolh maniar e dormir,
		e joys mi fai rir’e bordir;
		mas l’ira·m pass’al bon conort,
	5	e·l joy rema, don suy jauzens
		per un’amor qu’ieu am e vuelh.
II		Dompn’ay. — Non ay. — Ia·n suy ieu fis! —
		No suy, quar no m’en puesc jauzir. —
		Tot m’en jauzirai, quan que tir. —
	10	Oc, ben leu, mas sempre n’a tort. —
		Tort n’a? Qu’ai dig! Boca, tu mens
		e dis contra midons erguelh.
III		Bona dompna, per que m’aucis? —
		Ara·m podetz auzir mentir,
	15	que re no·m fai per que m’azir. —
		Non re, si [m’]a per pauc tot mort? —
		Ben suy folhs e fatz es mos sens,
		quar ia dic so per que la·m tuelh.
IV		Molt am selieys qui m’a conquis. —
	20	Et elha me? — Oc, so l’aug dir. —
		Creirai son dig senes plevir? —
		Oc ben, ab sol que·l fag s’acort,
		e m’atenda totz mos covens,
		e qu’ieu n’aya plus qu’ieu no suelh.
V	25	Per lieys ai ieu joy, joc e ris,
		mas ara·n planh, plor e sospir;
		e·l mals, que m’es greus a sufrir,
		torna·m a doble en deport;
		pauc pres lo mal que·l bes o vens,
	30	que plus m’en ri que no m’en duelh.
VI		De luenh li suy propdas vezis,
		qu’amicx non pot nulhs hom partir,
		si·l cor se volon cossentir;
		tot m’es bon quant hom m’en aport;
	35	mais am quan cor de lai lo vens,
		que d’autra si pres si m’acuelh.
VII		Ja non dira hom, qu’anc la vis,
		que tan belha·n pogues chauzir,
		qu’om no la ve que no s’i mir;
	40	e sa beutaz resplan tan fort,
		nuegz n’esdeve jorns clars e gens
		a selh qui l’esgard’a dreyt huelh.
VIII		Lo vers vuelh qu’om midons me port,
		e que·l sia conortamens,
	45	tro que·ns esguardem de dreyt huelh.