Nicholson, Derek E. T. The Poems of the Troubadour Peire Rogier. Manchester: Manchester University Press, 1976.

Code: 356,007 Auteur: Peire Rogier Genre: Vers (avec réponse) Numero: VIII

Seign’en Raymbaut, per vezer

I	1	Seign’en Raymbaut, per vezer
		de vos lo conort e·l solatz
		soi sai vengutz tost e viatz,
		mais que non soi per vostr’aver;
	5	qe sapcha dir, qan m’en partrai,
		cum es de vos ni cum vos vai,
		q’enqeront m’en lai entre nos.
II		Tant ai de sen e de saber
		e tant sui savis e membratz,
	10	qand aurai vostres faitz gardatz,
		q’al partir en sabrai lo ver,
		s’es tals lo gaps cum hom retrai,
		si n’i a tant o meins o mai,
		cum auch dir ni comtar de vos.
III	15	Gardatz que vos sapchatz tener
		en aisso q’eras comenssatz,
		car hom, on plus aut es poiatz,
		plus bas ven, si·s laissa cazer;
		pois dizon tuich qe mal l’estai:
	20	‘Per que fetz, pois era non fai,
		q’era non ten conduitz ni dos?’
IV		C’ab pro maniar et ab cazer
		pot hom estar soau malvatz,
		mas de gran affan es cargatz
	25	sel que bon pretz vol mantener;
		ops l’es qe·s percatz sai e lai
		e toill’e don, si cum s’eschai,
		qan veira qu’er luocs e sazos.
V		No·us fassatz de sen trop temer,
	30	per c’om diga: ‘Trop es senatz,’
		q’en tal luoc vos valra foudatz
		on sens no·us poiria valer;
		tant cant auretz pel saur e bai
		e·l cors aissi fresquet e gai,
	35	grans sens no·us er honors ni pros.
VI		Si voletz al segle plazer,
		siatz en luoc fols ab los fatz,
		et aqui mezeus vos sapchatz
		ab los savis gen captener;
	40	c’aissi coven c’om los assai:
		l’un ab ira, l’autre ab jai,
		ab mal los mals, ab ben los bos.
VII		D’aisso vuoill qe·m digatz lo ver,
		s’auretz nom drutz o moilleratz,
	45	o per cal seretz apellatz,
		o si·ls volretz ams retener;
		veiaire m’es al sen q’ieu ai,
		segon q’ieu cuich, mas non o sai.
		c’a dreich los auretz ambedos.
VIII	50	Seign’en Rambaut, eu m’en irai
		mas vostre respos auzirai,
		si·us platz, anz qe·m parta de vos.