Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Introduction

* Présentation
* Bibliographie
* Témoignage
* Appareil critique
* Notes
* Traductions
* Images

Shepard,William P.. Two Provençal Tenzoni. "Modern Philology", 23.1 (1925), pp. 17-28

Code: 010,003=016,003 Auteur: Aimeric de Peguillan , Albertet Genre: Tenso (partimen) Numero: I

N’Albertz, chausetz al vostre sen 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 






                                                                  

I 1
N’Albertz, chausetz al vostre sen
    D’un amic qu’enquier per amor
    Doas domnas d’una valor;
  4 E l’un’ ama lui e·ill consen
    Lo plus, ab que de l’autra·s lais,
    Qu’el ama·l doble meillz e mais.
    Et aquella no·l vol amar ni·l deingna.
  8 Digatz ab cal d’ambas l’es mielz que·s teingna.
     
II  
N’Aimerics, pauc a d’escien
    Qui no·n sap triar lo meillor.
    A guissa de fin amador
  12 Voill amar celei coralmen
    De cui anc mos cors no s’estrais.
    E vos voill c’amez en biais!
    Qu’ieu non ai cor que fals guizardon preingna,
  16 Anz voill servir tan c’al ric joi aveingna.
     
III  
N’Albertz, ben sai que·l conoissen
    Tendran, e·l bon entendedor,
    Vostra rason per sordejor;
  20 C’ab mej’ amor sai qu’es plus gen
    C’om baizan jazen sia gais,
    C’ab tota sospir e pantais.
    Mais pres lo frug on ab las mans ateingna
  24 C’aisel qu’es autz on lansar mi coveingna
     
IV  
N’Aimerics, ges no m’es parven
    Que·us entendatz en gran honor;
    E no s’eschai a preguador
  28 C’aissi s’an canjan ni volven,
    Anz deu esser fis e verais.
    E no voill c’aitals frugs m’engrais;
   
Mais voill esser tot temps secs plus que leingna
  32 Que manje frug de que talanz no·m veingna.
     
V  
N’Albertz, quar son comunalmen
    D’engal beltat e de lausor,
    Fas a lei de bon partidor,
  36 Que·ls mals vos las e·ls bens eu pren;
    Qu’als bens taing c’om s’afraign’ e·s lais
    E fuja·ls mals a grant eslais;
    Qu’anz que s’arda ni que trop s’escompreingna
  40 Deu om gardar del foc ab que l’esteingna.
     
VI  
N’Aimerics, li galiamen
    Que fan li fals e·il trichador
    An tornat domnei en error;
  44 Et a vos non es avinen
    Que·us dejatz cargar d’aital fais;
    Qu’anc fis amics sidonz no trais;
    Et eu sui cel cui fin’ amors enseingna,
  48 Que leialmen ves ma domna·m capteingna.
     
VII  
N’Albertz, car es de beutat rais
    Na Biatritz d’Est, on pretz nais,
    Voill d’aquest plaig juge so que·s coveingna;
  52 Mais eu cre ben que ma rason manteingna.
     
VIII  
N’Aimerics, a n’Emilla lais
    De Ravena, q’ades val mais
    En totz bons faitz c’a pro domna coveingna,
  56 Lo jujamen, e c’ab lo dreg s’en teingna.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI