Chaytor, H. J.. Poésies du troubadour Perdigon. "Annales du Midi", 21 (1909), pp. 153-168, 312-337

Code: 370,009 Auteur: Perdigon Genre: Canso Numero: I

Los mals d'amor ai eu ben totz apres

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

 

  

 

I	1	Los mals d'amor ai eu ben totz apres ;
		mas anc los bes non puoc un jorn saber,
		e si non fos qu'ar ieu ai bon esper
		ben cujera que no n'i agues ges,
	5	et agra dreit que·m fos desesperatz,
		tant ai amat et anc no fui amatz ;
		pero si·l bes es tant dous e plazens
		cum es lo mals angoissos e cozens,
		anz vuelh morir qu'ieu ancar non l'atenda.
II	10	Atressi·m cug que·l mortz mais me valgues
		que vida sai tostemps ses mon Plazer ;
		e doncs m'es mielhs que mueir' en bon esper
		c'aja vida que ja pro no·m tengues ;
		c'assatz es mortz totz homs que vieu iratz
	15	a cui non es jois ni plazers donatz ;
		eu sui ben cel que negus gausimens
		non pot dar joi per que sia jausens
		tro qu'a mi dons plassa merce li·n prenda.
III		E sien per so sui forfaitz ni mespres
	20	car sol vos aus desirar ni voler,
		ges per tot so no·m tuelh de bon esper,
		que major tort perdona ben Merces ;
		pero si·l tortz mi fos a dreich jutgatz
		non cujera tan esser encolpatz ;
	25	mas vencut es tot so que forsa vens,
		que negus dreitz no i pot esser guirens,
		per que m'es obs que Merces me defenda.
IV		La grans beutatz e·l valors qu'en lieis es
		e tuich bon aip que dompna puesc' aver
	30	mi fan ades estar en bon esper ;
		que so non cuich que ges esser pogues
		que lai on es totz autres bes pausatz
		que no i degues esser Humilitatz ;
		so·m fai sofrir mas dolors bonamens,
	35	qu'Umilitatz, Merces e Chausimens
		m'en pot valer sol qu'a mi dons s'en prenda.
V		Eu et Amors em d'aital guis'enpres
		qu'ora ni jorn, nuoich ni maitin ni ser
		no·s part de me ni eu de bon Esper ;
	40	que mort m'agra la dolors, tant greus es,
		si·n bon Esper no·m fos asseguratz ;
		pero mos mals non es en re mermatz,
		que bos Espers m'aura faich longamens
		estar marrit et en grans pessamens
	45	et ancar tem que plus car no m'o venda.
VI		Mas s'ieu un jorn fos amics apelhatz
		de tant bon cor cum eu li·m sui donatz,
		a la bella don no·s part mos talens,
		anc tant Amors no·m destreis malamens
	50	qu'en eis lo jorn no·m n'agues fach esmenda.
VII		Vas n'Azimans vuelh, chanso, que tengatz,
		et a·n Tostems, car lur seretz plazens ;
		mais non tengatz entre las avols gens,
		car qui mais val, crei que mielhs vos entenda.