Chaytor, H. J.. Poésies du troubadour Perdigon. "Annales du Midi", 21 (1909), pp. 153-168, 312-337

Code: 370,004 Auteur: Perdigon Genre: Canso Numero: VI

Cil cui plazon tuit bon saber

I	1	Cil cui plazon tuit bon saber
		can mais ve, mais sap ni apren ;
		e[l] mal neis deu hom retener
		per meil·s gardar de fallimen,
	5	e dels altres deu son pretz enantir,
		s'ama valor ni·s vol faire grazir ;
		me plazon tug e·n son mout enveios,
		mas sens m'en faill e poder per sazos.
II		Pero tan m'an dat de lezer
	10	sens e fins Amors, cui mi ren,
		c'ab mi dons mi fan remaner
		amic e leyal e sufren
		et a tot so c'a leis deu abelir ;
		e s'ieu volgues lausengiers consentir
	15	c'a plaitz d'amor son totz temps enueyos,
		leu pogr'esser d'amor e de joi blos.
III		Mas d'aitan ai apres lo ver
		que si·m fai tort ni·m fraing coven
		cela qui·m ten en son poder,
	20	conort m'en sera s'en repen ;
		per qu'ieu non voill si al tort avenir,
		car cel que·s vol francamen repentir
		tem faillir pois, tant li platz lo perdos
		e·n creis amors e gratz e gazardos.
IV	25	E pus li jur e·l faz parer
		que·l am mais d'autra re viven,
		be·m par qu'el'o deinha voler
		que·l dei perdonar si·l meins pren ;
		no cugei doncs tan sas colpas sofrir
	30	com a la res que pus am e desir ;
		car tot lo mon vei com trob'ochaisos,
		mas meins n'an cel qui plus son temeros.
V		Bell'ami', al vostre valer,
		cui fina lauzors no repren,
	35	me fi tan, per qu'eu non esper
		que fassas nuill plait desplazen ;
		c'al meins a Dieu non s'en pot ges cobrir,
		cel c'a rescos no·s garda de faillir ;
		pois mostra Dieus lui el blasme amdos
	40	don cel remain aunits e vergonhos.