Aston, S. C.. Peirol. Troubadour of Auvergne. Cambridge: University Press, 1953

Code: 366,002 Auteur: Peirol Genre: Canso Numero: I

Atressi co·l signes fai

I	1	Atressi co·l signes fai
		quant vol morir, chan,
		quar sai que genseis morrai
		et ab mens d’afan.
	5	Ben m’a amors tengut el latz
		e mainz trebaills n’ai sofertatz,
		mas pel dan c’aora m’en ve
		conosc qu’ancmais non amei be.
II		E doncs qual conseill penrai
	10	s’aissi muer aman?
		Qu’ieu joi non aten de lai
		on miei sospir van;
		pero non part ma voluntatz,
		si tot n’estauc desesperatz.
	15	Pensiu e consiros mi te
		cella de cui plus mi sove.
III		El mon tal domna non sai.
		Dieus, per que l’am tan?
		Que ja non li  ausarai
	20	dire mon talan.
		Gen m’acuoill e·m fai bel solatz,
		mais del plus son desconseillatz,
		car, s’ieu li  clamava merce,
		tem que puois se guardes de me.
IV	25	Preiars, lai on non s’eschai,
		torn’ en enuey gran.
		Ses parlar la preiarai.
		E com? ab semblan,
		et ill conosca o  si·l platz.
	30	Car aissi dobla·l jois e·l gratz
		quant us cors ab autre s’ave,
		e quant hom ses querre fai be.
V		Franquez’ ab fin cor verai
		trai amor enan;
	35	autz paratges la deschai,
		que·ll ric son truan,
		que tan n’i a de rics malvatz
		per que·l segles n’es sordeiatz.
		E domna, que bon pretz mante,
	40	non am per ricor, s’als no i ve.
VI		Chansoneta, vai t’en lai,
		non ges q’ieu re·il man,
		mas ben li potz mon esmai
		dire ses mon dan.
	45	Digatz li c’a leis es donatz
		mos coratges et autreiatz;
		sieus son e sieus serai jase;
		morir puosc per ma bona fe.
VII
		Bona domna, on que siatz,
	50	jois si’ ab vos e joi aiatz,
		qu’ eu non vos aus clamar merce
		mas sivals pensar o puosc be.