Aston, S. C.. Peirol. Troubadour of Auvergne. Cambridge: University Press, 1953

Code: 366,033 Auteur: Peirol Genre: Canso Numero: IV

Tot mon engeing e mon saber

I	1	Tot mon engeing e mon saber
		ai mes en un joi qe·m soste,
		quan mi remembra ni·m sove
		tan bona dompna·m fai chantar.
	5	Adoncs mi deuri’ esforsar
		cum pogues far mon chan valer,
		si ben trac greu martire
		d’amor, cui soi servire.
II		Amors m’a si en son poder
	10	e m’a fach comensar tal re
		qu’ieu non puesc a mal ni a be
		trair’ a cap plus qu’al cel montar.
		Per la genssor c’om pot trobar,
		gardatz si·m deuri’ escazer!
	15	Q’ieu l’am tant e dezire
		qu’ailhors mon cor non vire.
III		Eu l’am mais que non fatz parer
		e parli·n mais que no·s cove;
		mais vuoill que m’aucia dese
	20	si ja mais m’en auzetz parlar
		ni ab dreich semblan esgardar,
		tant sai cubertamen tener
		e celar mon dezire
		ab jogar et ab rire.
IV	25	Lo reproviers non ditz ges ver
		que’ cors oblida c’uoills non ve’.
		Ans a ben failhit enves me,
		qu’ieu no la puosc er oblidar,
		la bella cui non aus preiar,
	30	tan tem failhir al sieu voler,
		per qu’ieu planc e sospire.
		Ai Amors! no·m aucire!
V		La nuoich qan sui anatz jazer
		e·l jorn maintas ves s’esdeve,
	35	cossir com li clames merce
		qand ab lieis poiria parlar.
		Adoncs m’o sai ieu ben pensar
		e bos motz triar e vezer
		e ma razon assire;
	40	pois lai no sai que dire.
VI		Ai las! cum cuidava aver
		qualque pro en ma bona fe!
		Cum plus sui desesperatz, cre
		c’amors mi degues ajudar.
	45	Eras no m’en sai conseillar,
		mas atendrai al sieu plazer.
		Grieu er d’amor jauzire
		qui no·s es francs sofrire.
VII		E·l vers non es a dire
	50	ses qui be·l sapcha dire.