Aston, S. C.. Peirol. Troubadour of Auvergne. Cambridge: University Press, 1953

Code: 366,015 Auteur: Peirol Genre: Canso Numero: V

En joi que·m demora

I	1	En joi que·m demora
		vuoill un sonet faire,
		quar be·m vai aora
		en tot mon afaire.
	5	Fin’ amors m’onora
		si qu’al mieu vejaire,
		ja tan rics no fora
		s’ieu fos emperaire.
		Qe·l coratge n’ai
	10	jauzion e gai,
		pero non a gaire
		qu’era mortz d’esmai.
II		Plus es amors bona
		qu’eu non puosc retraire;
	15	qui la malrazona
		non es fis amaire.
		Tan gen guizerdona,
		si tot fai maltraire,
		qui s’i abandona
	20	no·ll es desfizaire.
		On que sia sai,
		mon pessamen ai
		en lo dous repaire
		on ma dompn’ estai.
III	25	Sieus sui qu’ilh me mena
		et es cortesia
		c’ab frevol cadena
		destreing fort e·m lia.
		Mos mals no·s refrena,
	30	ben garitz seria
		s’ab tan doussa pena
		midonz m’aucizia.
		Ja no m’en partrai
		a ma vida mai;
	35	s’ieu totz temps vivia
		totz temps l’amarai.
IV		Francha res cortesa,
		bella douss’ amia,
		al cor vos m’a mesa
	40	Amors tota via;
		grans joia m’es presa
		d’aital compaignia,
		qu’ieu sui, si no·us pesa,
		vostres on qu’ieu sia.
	45	Ja ren no·us querrai
		anz vos servirai,
		e qant no·us plairia,
		ja ren no·us dirai.
V		S’ieu, per alegransa,
	50	vuoill cantar e rire
		d’un joi que m’enansa
		don ieu sui jauzire,
		ja, dompna, doptansa
		non aiatz del dire
	55	qu’ieu fassa semblansa
		que de vos cossire.
		Ben e gen mi sai
		cobrir, qan sui lai;
		s’ieu mos huoills vos vire,
	60	ben tost los n’estrai.
VI		S’om ren mi demanda
		de mon dous dezire,
		Amors mi comanda
		vertat escondire.
	65	Mout coven que blanda
		lieis qu’ieu plus desire,
		que foudatz es granda
		s’ieu qier qu’ilh m’azire.
		Gardatz cum s’eschai
	70	o cum si me vai;
		so que·m sol aucire
		m’adutz joi verai.
VII		Cansoneta, vai
		dreich a midons lai,
	75	e potz li·m ben dire
		qu’en breu la verai.