Gambino, Francesca. Canzoni anonime di trovatori e "trobairitz". Alessandria: Edizioni dell'Orso, 2003.

Code: 461,197 Auteur: Anonyme Genre: Canso Numero: VIII

Pos vezem que l'ivers irais

I		Pos vezem que l'ivers irais
		et part se del tanz amoros,
		que non au ges notes ni lais
		des auselz per vergers foilloz,
	5	per lou freit del brun temporau
		non leisserai un vers a far,
		et dirai alques mon talant.
II		Lonc desirrier et griu pantais
		n'ai agut al cor cubitos
	10	vers cele qui soaf mi trais;
		maiz ainc vers li non fui geignos,
		ainz la portave el cor leial.
		Mol fui legiers a enganar,
		mes peccas n'aie deus aman.
III	15	No gins per autr'orgueill no·n lais
		de s'amor, dont tant sui coitous:
		et conneis ben con ben mi pais
		et sui galias a estrous.
		Las! remasus sui del chabau,
	20	quant per autre non vol poignar
		per me ni per mon drughemant.
IV		Tot m'escharatz, car a gran fais
		me tieng, dosne, quan pens de vos;
		et quant n'oi parlar, m'es esglais,
	25	et ia ior no·n serai iauzos,
		qu'eu sui iras de vostre lau
		et ab ioi de vostre blasmar,
		et plaisen me tuit vostre dan.
V		Non pos mudar que no·n biais
	30	vers aquest ioi tant orgueilloz,
		qu'ainc non vi orgueill non abais:
		quan pluz en poie, meuz ca ious;
		et est folz qui ve et qui au,
		et si non sab son meuz triar;
	35	et n'a el siegle d'aquest tan.
VI		Huimais s'en faignent druç et lais,
		cel qui n'ai' estat enuios,
		qu'a toz l'esfenis et le lais
		per oc que no·n soi poderos.
	40	Pos poder n'i sab ben ni mau,
		ben es dreis c'om la desampar;
		et ai ne perdu mon afan.