Aston, S. C.. Peirol. Troubadour of Auvergne. Cambridge: University Press, 1953

Code: 366,008 Auteur: Peirol Genre: Canso Numero: VII

Cora qu’amors vuelha

I	1	Cora qu’amors vuelha,
		ieu chan,
		qu’autra flor ni fuelha
		no y vauc gardan.
	5	Ben es dregz que·m duelha,
		aman,
		pus vas me s’orguelha
		silh, cui me coman.
		Perdut ai
	10	e cobrarai,
		ges no’m recre per tan,
		qu’aissi·s va·l segles camjan.
II		Deus m’ajut e·m valha,
		qu’antan
	15	aic d’amor ses falha,
		mais no·n ai oguan;
		qu’era·m mou baralha
		tan gran
		al cor, e·m trebalha
	20	dormen e velhan.
		Per qu’o fai?
		qu’al mielhs qu’ieu sai
		la serv e la reblan;
		per so vei qu’ieu m’i ai dan.
III	25	Mos cors salh e trembla
		soven,
		m’amia lo m’embla
		si qu’ieu non o sen;
		qu’ilh m’ama, so·m sembla.
	30	Comen?
		Que·ls sieus ditz assembla
		al meu pensamen.
		Donc dirai
		que mout mi plai
	35	sufrir aquel turmen,
		don eu tan ric joi aten.
IV		Nuls hom be non ama
		ni gen,
		que d’amor si clama,
	40	si tot mal l’en pren;
		com plus m’enliama
		greumen,
		e m’art e m’aflama,
		n’ai melhor talen.
	45	Aissi·m trai
		mos volers lai
		el fol contenemen
		on m’es mantas vetz parven.
V		Ben bas fora meza
	50	valors,
		deportz e gayeza,
		si no fos amors,
		que mante proeza
		totz jors
	55	e fai que corteza
		d’ome savai
		car pren los melhors.
		No s’eschai
		li venga tan d’onors
	60	que d’amor senta dolors.
VI		Era·us quier, amia,
		socors,
		qu’enansas morria
		qu’en quezes alhors.
	65	Assatz trobaria
		auctors;
		vos etz ses fadia
		caps de las melhors.
		Mos cors jai
	70	en gran esmai
		entre sospirs e plors;
		mas tot m’es jois e doussors.
VII		Peirols fai
		fin e verai
	75	lo sonet per amors
		on sos cors estai totz jors.