Aston, S. C.. Peirol. Troubadour of Auvergne. Cambridge: University Press, 1953

Code: 366,014 Auteur: Peirol Genre: Canso Numero: VIII

D’un sonet vau pensan

I	1	D’un sonet vau pensan
		per solatz e per rire,
		e non chanter’ ogan
		estiers per mon cossire,
	5	don mi conort chantan;
		qu’amors m’auci d’esmai
		quar m’a trobat verai
		plus de nuill autr’ aman.
II		Sivals be·m vai d’aitan
	10	que ges no·m pot aucire
		a plus onrat afan
		ni ab tant douz martire.
		C’a tal domna·m coman
		qu’es la genser qu’ieu sai;
	15	bos m’es lo mals qu’ieu trai
		mas ill n’a pechat gran.
III		Ren per autrui no·l man
		de so que plus desire,
		ni eu eus, tant la blan,
	20	re no l’en auzi dire.
		Ans quan li sui denan
		maigntas vetz quan s’eschai
		dic; ‘Dona, que farai?’
		no·m respon mas guaban.
IV	25	Las! com muor desiran,
		sos hom e sos servire,
		qe·m n’iria celan.
		Maigntas vetz m’en azire
		e dic per mal talan
	30	que tot m’en partirai;
		pois aqui eus trob lai
		mon cor on er’antan.
V		Li huoill del cor m’estan
		a lieis vas on q’ieu vire,
	35	si c’ades on qu’ill an
		la vei e la remire
		tot per aital semblan
		cum la flors c’om retrai
		que totas vias vai
	40	contra·l soleill viran.
VI		S’una vetz tan ni qan
		eu fos estatz gauzire,
		sapchatz non es d’engan
		que soven eu sospire.
	45	Domna, per cui eu chan,
		una ren vos dirai,
		s’aqest vostr’om dechai
		anta i auretz e dan.
VII		D’amor vos dic eu tan
	50	que bon respiech en ai,
		e ja d’aqui en lai
		nuills hom no m’en deman.
VIII		Chansonet’ ab aitan
		dreich a midonz t’en vai,
	55	e digas li, si·l plai,
		que t’aprenda et chan.