Aston, S. C.. Peirol. Troubadour of Auvergne. Cambridge: University Press, 1953

Code: 366,012 Auteur: Peirol Genre: Canso Numero: XII

Del sieu tort farai esmenda

I	1	Del sieu tort farai esmenda
		lieys que·m fetz partir de se,
		qu’enquer ai talan que·l renda,
		si·l platz, mas chansos e me
	5	ses respieg d’autra merce;
		sol suefra qu’en lieys m’entenda
		e que·l belh nien n’atenda.
II		Ges per negun mal qu’en prenda
		de s’amistat no·m recre,
	10	ans suefri c’ades m’acenda
		la pen’ e·l danz que m’en ve.
		Faire·m degra qualque be,
		mas no·s tanh qu’ieu la·n reprenda
		si tot s’es vers qu’ilh mesprenda.
III	15	Molt en cossir nueg e dia
		e no m’en sai cosselhar.
		Pero, si s’esdevenia,
		gran talan ai qu’un baisar
		li pogues tolr’ o emblar;
	20	e si pueys s’en iraissia
		voluntiers lo li rendria.
IV		Ben conosc qu’ieu no poiria
		mon cor de s’amor ostar
		per ira ni per feunia
	25	ni per autra domn’ amar.
		No m’en cal plus assaiar;
		aissi cum li plaira, sia,
		qu’ieu l’amarai tota via.
V		El mon non es hom que tenha
	30	tan apoderat amors,
		que ges non vol qu’ieu retenha
		los plasers ni las honors
		qu’avia trobat aillors;
		ans vol que sai mi destrenha
	35	per tal que no·m vol ni·m denha.
VI		Belha domna, en cui renha
		senz e beutatz e valors,
		suffriretz qu’aissi m’estenha
		lo desirs e la dolors?
	40	Sivals dels plazers menors
		mi faitz tant que joys m’en venha,
		sol qu’a vos non descovenha.
VII		Chansoneta, vai de cors
		dir a midons que·t retenha,
	45	pus mi retener non denha.
VIII		Dalfi, solatz et amors
		e cortes sens vos essenha
		cossi joys e pretz vos venha.