Aston, S. C.. Peirol. Troubadour of Auvergne. Cambridge: University Press, 1953

Code: 366,016 Auteur: Peirol Genre: Canso Numero: XVII

Eu non lausarai ja mon chan

I	1	Eu non lausarai ja mon chan;
		mas si·us agrada ni bons es,
		l’amor, que m’a en son coman,
		en sapchatz grat, qu’a mi non ges,
	5	car amors me guid’ e m’enansa.
		E si·m da trabalh e pezansa,
		eu viu jauzens, quan muor aman.
II		Midonz per sa franchesa gran
		plac que receup mon homenes,
	10	e·m fes e·m dis e·m promes tan
		qu’ieu non cuidei c’om mi valgues.
		Mas eras estau en doptansa
		que per non cur’ o per viltansa
		m’oblit o qe·m met’ en soan.
III	15	Molt fui autz, mas ar vau baissan.
		Dire puosc q’enaissi m’es pres
		com celui que vai joy sonian
		e quan rissida, non es res.
		On trobarai jamais fiansa
	20	en neguna bella semblansa
		pois en aquesta trob engan?
IV		Trop dic; non puesc als, que mort m’an
		atendres e longa merces.
		Que farai donc deserenan?
	25	Degra m’en partir si pogues,
		mas, mentre n’estauc en balansa,
		si me loigna desesperansa,
		fin’ amors m’apropch’ atretan.
V		Sofrir m’er la pen’ e l’afan
	30	totz temps, non pas dos jorns ni tres,
		anz c’aillors vire mon talan,
		qe·l maltraitz val totz autres bes.
		Sol de vos, don’, ai deziransa
		que·m donetz joy e alegransa;
	35	cosseill el mon plus non deman.
VI		Ja drutz non conosca son dan
		s’esser vol savis ni cortes,
		ni fassa ni diga semblan
		que res contra sidons li pes;
	40	car cel enqier sa malanansa
		qui per orgoill cuida vengansa
		penre aqui on hom no·l blan.
VII		Dona, ren no val ni enansa
		en amor trop long’ esperansa;
	45	qui ama, faire·n deu semblan.