Javascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.comJavascript DHTML Drop Down Menu Powered by dhtml-menu-builder.com

* Introduction
* Notice Bibliographique
* Vocabulaire
* Observations

* Présentation
* Témoignage
* Appareil critique
* Notes
* Traductions
* Images

Aston, S. C.. Peirol. Troubadour of Auvergne. Cambridge: University Press, 1953

Code: 366,031 Auteur: Peirol Genre: Canso Numero: XXII

Si be·m sui loing et entre gent estraigna

I 1
Si be·m sui loing et entre gent estraigna
    eu ai pensier d’amor en que·m conort,
    e pens d’un vers cossi·l fass’ e l’acort
    tal que sia bos e valens e fis;
  5 et on hom plus mos chantars mi grazis
   
e mieils me dei gardar que no·i mesprenda
    ni diga ren don savis me reprenda.
     
II  
Non es nuills jorns qu’en mon cor non dissenda
    una dolsors qe·m ven de mon pais.
  10 Lai joing mas mans e lai estau aclis,
    e lai, sapchatz, que volri’ esser fort,
    pres de midonz, sitot a vas mi tort;
    c’ab bel semblan et ab doussa compaigna
    me dauret gen so qu’aora m’estaigna.
     
III 15
Ar ai assatz que plor e que complaigna,
    c’a pauc lo cor no·m part quan mi recort
    e mi soven del ris e del deport
    e dels plazers qu’ela·m fetz e que·m dis.
    A! cum fora garitz s’adoncs moris!
  20 Que quand li prec que de mi merce·ill prenda
    sol vejaire non fai qu’ella m’entenda.
     
IV  
Ben ai razon que sofra et atenda.
    Cum atendrai, pois lieis non abellis?
    Miels me fora, so cre, que m’en partis.
  25 Partir? Non ges! Trop n’ai pres lonc acort.
    Bona dompna, vostr’ om sui tot a fort;
   
et no·us cuidetz l’amors en mi remaigna,
    qu’a vos amar tem que temps mi soffraigna.
     
V  
Lieis non faill res c’a pro dompna s’ataigna,
  30 c’om no la ve que de lieis laus non port.
    Bell’ e gai’ es e pros, per que l’am fort.
    E doncs amors, cui totz temps sui aclis,
    plairia·il ja c’una vetz m’en jauzis;
    aquesta·il quier per don e per esmenda
  35 o ja d’autra mais guizerdon no·m renda.
     
VI  
D’autre trebaill prec Deu que la defenda,
    mas sol un jorn volgra qu’ela sentis
    lo mal qu’ieu trac per lei sers e matis;
    qu’en greu perill m’a laissat loing del port.
  40 E non vuoill ges qu’autra m’en ai’ estort,
    car s’a lieis platz que ja vas mi s’afraigna
    anc hom non fetz d’amor genssor gazaigna.
     
VII  
Non laissarai, dompna, lo vers no·us port;
    qu’enaissi·m ten lo desirs en greu laigna,
  45 non pot esser que ja plus sai remaigna.

 

 

Institut d'Estudis Catalans. Carrer del Carme 47. 08001 Barcelona.
Telèfon +34 932 701 620. Fax +34 932 701 180. informacio@iec.cat - Informació legal

UAI