Aston, S. C.. Peirol. Troubadour of Auvergne. Cambridge: University Press, 1953

Code: 366,006 Auteur: Peirol Genre: Canso Numero: XXIII

Camjat ai mon consirier

I	1	Camjat ai mon consirier,
		—camge c’ai fag d’amia,
		don ai fin joi vertadier
		plus c’aver non solia.
	5	Mas non es de pretz sobrier;
		ieu per que·n mentiria?
		Qu’ieu aug dir’ el reprovier;
		‘Qui non troba, non tria
		e qui pren no·s fadia.’
II	10	Entendre·m fazi’ amors
		en folla ricaudia,
		en las riquesas ausors,
		don mal mon grat sofria
		penas e dans e dolors
	15	si c’a totz jornz moria.
		Guardatz s’era be follors
		quant ieu plus i perdia
		e meils m’i entendia!
III		Era·m sui amesuratz
	20	e sec ma dreita via.
		Qant que fos ma volontatz
		plus aut que non devia,
		ben dei esser castiatz
		pel dan que m’en venia,
	25	c’aissi es dobla foudatz
		d’ome que no·s castia
		pois conois sa follia.
IV		Per qu’ieu sai qu’estera be
		e fora cortesia
	30	que ja hom non ames re
		mas so que l’amaria.
		Preiars s’ataing e·s cove,
		qui mesura metia,
		mas sapchatz qui trop o te
	35	so es semblan que sia
		orguoills e vilania.
V		Era conosc et enten
		qu’es bona compaingnia
		can dui s’amon finamen
	40	per leial drudaria,
		e cascus tot franchamen
		ves son par s’umelia.
		Car amors non vai queren
		enueg ni tricharia
	45	mas merce tota via.
VI		Lai on ai mon bon esper
		m’atrai amors e·m lia,
		don non aus ni puesc mover
		mon dezir nueg ni dia.
	50	Ben pot ma domna saber
		c’aissi l’am ses bauzia,
		que ren contra·l sieu voler
		mos cors non pensaria
		ni boca non diria.
VII	55	Ben m’en vai mas miels n’esper;
		vai, chansos, dreita via
		a la bell’ on q’ill sia.
VIII		E di li que·l fas saber
		c’autra no voill que sia
	60	de mon joi garentia.