Aston, S. C.. Peirol. Troubadour of Auvergne. Cambridge: University Press, 1953

Code: 366,009 Auteur: Peirol Genre: Canso Numero: XXIV

Coras que·m fezes doler

I	1	Coras que·m fezes doler
		Amors, ni·m dones esmai,
		ara·m ten jauzen e gai,
		per qu’ieu chan a mon plazer.
	5	Qu'ieu ai plus ric joi conquis
		qu’a  mi no·s taignia;
		e quan ricors s’umilia,
		humilitatz s’enriquis.
II		Midons mercei e grazis
	10	la benanansa q’ieu ai,
		e ja non oblidarai
		los plazers que·m fes ni·m dis;
		qu’en mi non a mais poder
		cil c’amar solia,
	15	qu’en plus franca seignoria
		vuoill ses engan remaner.
III		Derenan m’er a tener
		al reprovier qu’om retrai;
		‘no·s mova qui ben estai’.
	20	Non farai eu ges per ver!
		Qe·l flama qu’amors noiris
		m’art la nuoich e·l dia,
		per qu’ieu devenc tota via
		cum fai l’aurs el fuoc plus fis.
IV	25	Be m’agrad’ e m’abelhis
		de dos amicx, quan s’eschai
		que s’amon de cor verai
		e l’us l’autre non trais,
		e sabon luoc e lezer
	30	gardar ses folia
		que lor bona compaignia
		non puosc’ enojos saber.
V		Soven l’anera vezer,
		la plus avinen q’ieu sai,
	35	si·l devinamen qu’om fai
		no m’avengues a temer.
		Pero mos cors es aclis
		vas lieis on qu’il sia,
		que fin’ amors joing e lia
	40	tals que part loindans païs.
VI		S’era part la crotz dels ris,
		don anc hom non tornet sai,
		non crezatz que·m pogues lai
		retener nuills paradis.
	45	Tant ai assis mon voler
		en ma douss’ amia
		que senes lieis non poiria
		negun autre joi aver.
VII		Chansos, oimais potz tener
	50	vas midons ta via,
		qu’ieu sai ben qu’ella volria
		te auzir e mi vezer.
VIII		Dalfi, s’auzes mon voler
		dir’ a ren que sia,
	55	tant am vostra seignoria
		que vos en saubratz lo ver.