Hüffer, Franz. Der Trobador Guillem de Cabestanh. Sein Leben und seine Werke . Berlin: L. Heimann, 1869

Code: 213,006 Auteur: Guillem de Cabestaing Genre: Canso Numero: I

I	1	Lo jorn, qeus vi domna, premieramen,
		Qant a vos plac, qeus mi laissez vezer,
		parti mon cor tot d’autre pensamen,
		e foron ferm en vos tut mei voler;
	5	q’aissim pausez, domna, el cor l’enveja
		ab un douz ris et ab un simpl’esgar,
		mi e qant es mi fezez oblidar.
II		Qel granz beutaz el solaz d’avinen
		eil cortes dit eil amoros plazer
	10	qem saubez far, m’embleron si mon sen,
		q’anc pois hora domna nol poc aver;
		a vos l’autrei cui mos fis cors merceja,
		per enantir vostre prez et onrar;
		a vos mi ren, q’om miels non pot amar.
III	15	E car vos am domna, tan finamen,
		qe d’autr’amar nom don’ amors poder,
		mas aizem da, q’ab autras cortei gen,
		don cug de mi la greu dolor mover;
		pois quant cossir de vos cui jois sopleja,
	20	tot’ autr’amor oblit e desampar,
		ab vos remanh cui tenc al cor plus car.
IV		E membre vos, sius plaz, del bon coven
		qe mi fezez al departir saber,
		don aic mon cor adonc guai e jauzen
	25	pel bon respeit en qem mandez tener;
		mout n’aic gran joi, s’era lo mals sim greja,
		et aurai lo, qan vos plaira encar,
		bona domna, q’eu sui en l’esperar.
V		E ges mals trags no men fai espaven,
	30	sol q’eu en cuit en ma vida aver
		de vos domna, qalaqom jauzimen,
		anz li mal trag mi son joi e plazer
		sol per aiso, car sai q’amors autreja,
		qe fis amans deu granz torz perdonar
	35	e gen soffrir mals trags, per gazanhs far.
VI		Aissi er ja domna, l’ora q’eu veja,
		qe per merce mi volhaz tan onrar,
		qe sol amic me denhez appellar.