Hüffer, Franz. Der Trobador Guillem de Cabestanh. Sein Leben und seine Werke . Berlin: L. Heimann, 1869

Code: 213,002 Auteur: Guillem de Cabestaing Genre: Canso Numero: II

Ancmais nom fo semblan

I	1	Ancmais nom fo semblan,
		q’eu laisses per amor
		solaz ni per joi chan
		ni plores per dousor;
	5	bem ten en son coman
		amors q’en mi comensa
		mainz dolz plazers, e cre,
		q’ad obs de leis me fe
		deus e per sa valensa.
II	10	Q’eum vau soven claman
		de so don faz lauzor,
		e vau leis mercejan
		don degra far clamor,
		re non faz per engan;
	15	mas cel cui amors gensa,
		deu soffrir mainta re,
		car en mainz locs s’ave,
		qel mal tanh qel bes vensa.
III		Nos deu planher d’afan
	20	ni dire sa dolor
		ni conoisser son dan
		ni de be far lausor
		amics qe va camjan
		soven sa captenensa;
	25	maint ne parlon dese
		qe non sabon de qe
		mou jois ni malsabensa.
IV		Sim destrenhez pessan,
		qe maintas vez qant or,
	30	vos cug esser denan,
		qe la fresca color
		el gen cors benestan
		tenc en tal sovinensa,
		de re als nom sove;
	35	d’aqest dous pes me ve
		franqes’ e benvolensa.