Hüffer, Franz. Der Trobador Guillem de Cabestanh. Sein Leben und seine Werke . Berlin: L. Heimann, 1869

Code: 213,001 Auteur: Guillem de Cabestaing Genre: Canso Numero: IV

Aissi com cel qe baissal fuelh

I	1	Aissi com cel qe baissal fuelh
		e pren de las flors la gensor,
		ai eu cauzit en un aut bruelh
		sobre totas la bellasor;
	5	qar eis dieus senes falhida
		la fez de sa eissa beutat
		e mandet, q’ab humilitat
		fos sa grans valors grazida.
II		Ab douz esgarz sei cortes huelh
	10	m’an fat gai e fin amador,
		et anc l’amors per q’eu mi muelh
		ab l’aiga del cor ma color,
		no fo per mi espandida;
		mas eram fai chantar de grat
	15	de tal on an maint condejat,
		q’uns no la tenc devestida.
III		Non dic fenhas ni laus cum suelh,
		mas ver don mi son mil auctor,
		q’usqecs desira so q’eu vuelh,
	20	q’al plus gai es lansa d’amor
		qe fer al cor ses gandida
		ab plazers plazens d’amistat;
		mas mi q’ail colp asaborat,
		com plus dorm mielhs mi ressida.
IV	25	Cauzimen fara sim acuelh,
		e merce contra sa ricor,
		qeu li mostrel mal de qem duelh,
		e qe m’aleuje ma dolor
		q’es dinz mon cor espandida;
	30	amors e cossirier m’a dat,
		qe del mielhs m’a enamorat
		q’es del Puoi tro en Lerida.
V		Sos rics prez es en l’aut capduelh
		de mi dons q’om te per gensor
	35	q’el mon se vesta nis despuelh;
		gent la saup far dieus ad honor,
		q’aissi es per pro chauzida
		lai on mostra sa gran beutat
		e son fin prez tant esmerat,
	40	q’a las pros n’esta garnida.
VI		Tant es gent’ e de bel escuelh,
		q’envejam tol d’autra amor,
		c’ab ensenhamen ses janguelh
		l’es dada beutaz ab valor,
	45	cortesia non oblida;
		q’us de cortesa voluntat
		la fai ses genh d’enemistat
		gardar o d’autr’es bruida.