Hüffer, Franz. Der Trobador Guillem de Cabestanh. Sein Leben und seine Werke . Berlin: L. Heimann, 1869

Code: 213,005 Auteur: Guillem de Cabestaing Genre: Canso Numero: V

Li douz cossire

I	1	Li douz cossire
		qem don’amors soven,
		domnam fan dire
		de vos maint vers plazen;
	5	pessan remire
		vostre cors car e gen
		cui eu dezire
		mas qe non faz parven;
		e sitot me deslei
	10	per vos, ges nous abnei,
		q’ades vas vos soplei
		de francha benvolensa.
		domna, on beutaz gensa,
		maintas vez oblit mei,
	15	q’eu lau vos e mercei.
II		Toz temps m’azire
		l’amors qeus mi defen,
		s’eu jal cor vire
		ad autr’entendemen;
	20	tolt m’avez rire
		e donat pessamen;
		plus greu martire
		nuls homs de me no sen;
		qar vos qe plus envei
	25	de re q’el mon estei,
		desautorc e mescrei
		e desam en parvensa;
		tot qant faz per temensa
		devez en bona fei
	30	prendre, neis qau nous vei
III		En sovinensa
		tenc la car’el dous ris,
		vostra valensa
		el bel cors blanc e lis;
	35	si per crezensa
		estes ves deu tau fis,
		vius ses falhensa
		intrer’en paradis;
		q’aissim sui ses toz cuz
	40	de cor a vos renduz,
		q’autra jois nom aduz;
		q’una no porta benda,
		q’en prezes per esmenda
		jaser ni fos sos druz,
	45	per las vostras saluz.
IV		Toz jorus m’agensa
		desirs, tan m’abelis
		la captenensa
		de vos per cui languis;
	50	bem par qem vensa
		vostr’amors, q’ans qeus vis
		fo m’entendensa,
		qeus ames eus servis;
		q’aissim sui remansuz
	55	sols ses autres ajuz
		q’ab vos, e n’ai perduz
		mans bes, quis vuelhals prenda;
		q’a mi plaz mais, q’atenda
		ses toz covenz saubuz
	60	vos don m’es jois creguz.
V		Ans qe s’encenda
		inz el cor la dolors,
		merces desenda
		domn’en vos et amors
	65	qe joi mi renda
		en lonhs sospirs e plors,
		nous o defenda
		paratges ni ricors;
		q’oblidaz m’es toz bes,
	70	s’ab vos nom val merces;
		ai! bella dousa res,
		molt feraz gran franqesa,
		s’al prim qeus aic enqesa,
		m’amessez o non ges;
	75	q’eras no sai qe s’es.
VI		Non trop contenda
		contra vostras valors;
		merces von prenda
		tals q’a vos si’onors;
	80	ja nom entenda
		dieus mest sos prejadors,
		si volh la renda
		dels qatre reis majors,
		qe ab vos nom valgues
	85	dieus e ma bona fes;
		qe partir nom posc ges,
		tant fort si es empresa
		m’amors, e si fos presa
		en baisan nius plagues,
	90	ja no volgram solves.
VII		Anc res q’a vos plagues,
		bona domna cortesa,
		tan no m’estet defesa,
		q’eu ans no la fezes,
	95	qe d’als mi sovengues.