Hüffer, Franz. Der Trobador Guillem de Cabestanh. Sein Leben und seine Werke . Berlin: L. Heimann, 1869

Code: 213,004 Auteur: Guillem de Cabestaing Genre: Canso Numero: VII

En pensamen me fai estar amors

I	1	En pensamen me fai estar amors,
		com pogues far una gaia canso,
		per la bella a cui m’autrei em do,
		qem fez chausir mest totas las gensors,
	5	e vol, q’eu l’am lejalmen ses engan
		ab verai cor et ab tota ma cura;
		si faz eu si q’ades creis e melhura
		l’amors qeill port, e doblan mei talan.
II		Gen m’a saubut garir de las dolors
	10	qem fez suffrir una longa saso,
		per tal qe ges non avia raso,
		qem fezes so per qem vires alhors;
		ar, s’il a sen, pot ben anar pensan,
		qen pauc d’ora se camja l’aventura;
	15	mal fai qils seus mena a desmesura,
		que ges pois tau l’autre nol amaran.
III		Q’eu ai auzit, a vos o dic senhors,
		d’un poderos emperador qe fo,
		per cui eran malmenat sei baro,
	20	don sos orgolhs baisset e sa vigors;
		e per so prec pro domna benestan,
		qe son amic no men oltra dreitura,
		q’en totas res fai bon menar mesura,
		e pent som tart, pois qant a pres lo dan.
IV	25	Bella domna, melher de las melhors,
		coind’e plazens de cors e de faiso,
		amors me ten en sa douza preso
		per vos, o dic qe pros m’er e honors;
		si ja fos lai, qe dieus m’espires tan,
	30	qem volgues far de vostre braz centura,
		e tot aitan com te lo monz e dura,
		non es mais res q’eu desir aver tan.
V		E pos tant val domna vostra valors,
		q’el mon non ha tan bella ni tan pro,
	35	ja no volhaz, q’eu vos serv’en perdo,
		cum majer es d’ome sa grans ricors,
		mielz deu gardar a cels qe servit l’an,
		q’aiso sapchaz, mou de gentil natura,
		q’om renda mal segon la forfaitura
	40	e ben per ben, domna, als nous deman
VI		Las, mil n’ai faiz entre sospirs e plors,
		tal paor ai, qe ja non aja pro,
		qant pens, com ez de gentil nasio,
		e cum vos ez de totas rais e flors,
	45	e cum vos sai coind’e bell’e prezan,
		e cum vos ez fin’ e lejals e pura,
		e cum cascus pleu e autrej’e jura,
		qe non avez el mon par ni semblan
		Domna, merce valham vostra valors,
VII	50	ja non gardez a vostre prez tan gran,
		mas, cum vos ai voluntat fin’e pura,
		e cum mos cors s’aficha e s’atura
		en vos amar, qe d’al non ai talan.