Jeanroy, A.. Poésies provençales inédites d'après les manuscrits de Paris. "Annales du Midi", 17 (1905), pp. 457-489

Code: 374,002 Auteur: Pons Barba Genre: Sirventes Numero: VI

Sirventes non es leials

I	1	Sirventes non es leials
		S'om noi ausa dir los mals
		Dels menors e dels comunals,
		E majorment dels majorals,
	5	Car ill fan los faillimenz tals
		C'om non deuria parlar d'als,
		E car eu·ls sai e non die cals,
		Mos sirventes n'es meinz cabals.
II		Pero·l dir me tol temors,
	10	C'om non ausa dels majors
		Aissi dir verais desonors
		C'om fai mensongieras lauzors:
		Per que n'es menre lur valors
		Car loignan les chastiadors,
	15	E vei rics los cossentidors
		C'al faillir lausan los seignors.
III		Que de nos don ve·l trobars
		Degra moure·l chastiars,
		Que tals es vils que fora cars
	20	Si no fos lo nostre calars;
		C'a nos non deu far lor donars
		Trop dir, ni pauc lur restancars
		C'atressi vergoingna lauzars
		Part razo, com a tort blasmars.
IV	25	Mas er non es acuillitz
		Blasmars, ni lauzars grasitz,
		Que tantz n'a malvestatz feritz
		Qe blasme sego·l[s] desgrazitz,
		E lauzar[s] vei de mainz issitz
	30	A sels c'an lausars enantitz,
		On vei lauzadors escarnitz,
		Que cel n'a meinz que meillz lo ditz.
V		Que vout es de sus en jos,
		Qu'en la cort del rei n'Anfos
	35	C'a'ps de nos era fons de dos,
		Vesem qu'em vengut em perdos,
		Que rend' e dos [dan] a garsos
		D'aisso que degran dar a nos:
		Per que fan, donan, d'un dan dos
	40	C'als auls dan e tolon als bos.
VI		Reis d'Arragon, torn m'en a vos,
		Car etz capz de bes e de nos.