Appel, Carl. Poésies provençales inédites tirées des manuscrits d’Italie. "Revue des langues romanes", 34 (1890), pp. 5-35

Code: 443,002a Auteur: Torcafol Genre: Sirventes Numero: [VIII]

Comunal veill, flac, plaides

I	1	Comunal veill, flac, plaides,
		paubre d'aver et escas,
		tant faitz malvais serventes
		que del respondre sui las;
	5	e·l vostra cavalaria
		venra tota ad un dia
		quant er cho denan detras,
		l'avols bos e·l bos malvas.
II		Anc un bon mot non fezes
	10	non i ages dos malvas,
		per qu'ie·us tolrai vostre ses:
		mon chan, ab que·us formias;
		quar chantatz ab vilania,
		que·ill comtessa me·n chastia
	15	que ten Beders e Burlas,
		que ditz que vos rebusas.
III
		Anc sagramen non tengues
		del tornel, quant l'avias;
		ni nuill temps ver non disses,
	20	si mentir non cuidavas;
		et anatz queren tot dia
		qu'om se fi; e qui se fia,
		tenetz lo taulier e·ls das,
		e del ioc sabetz assas.
IV	25	Qui·us tolia Vivares,
		l'Argentieira e·l Solas,
		on lor comtatz mainz orbes,
		mesures vos hom lo vas;
		que quant Pons-tortz vos passia
	30	e Sainz-Laurens vos vestia,
		siatz totz paubres e ras,
		que sieus es anquer, si·os plas.
V		Et avez tanz de mals pres
		aras e d'aissi en tras
	35	que non sai cum vos tolgues
		qui·l pe no·us tolli' o·l nas
		o del tot no·us aussizia.
		si no fos la cofrairia
		de Chasiers e de Carlas,
	40	ab los pecols anaras.