Eichelkraut, Franz. Der Troubadour Folquet de Lunel. Berlin: W. Weber, 1872

Code: 154,004 Auteur: Folquet de Lunel Genre: Canso mariana Numero: III

Per amor e per solatz

I	1	Per amor e per solatz,
		e per fin joy mantener,
		e per far lieys plazer,
		si puesc, de cuy soi denatz,
	5	fas chansoneta leugeira,
		e quar suy de tal maneira,
		que nuech ni jorn la fin’ amors nom gic,
		qu’ieu port a lieys, que d’amar m’afortic.
II		E sitot s’es brugz levatz,
	10	quem ditz, qu’ers non pot valer
		chanso qu’om fassa, ges per
		aquo fis enamoratz,
		pus es ben en la carreyra
		d’amor, non tanh que sofeyra
	15	de far chanso, si sap; sitot l’antic,
		doctor feyron chans, qu’om mais lor grazic.
III		Mas ja per otracujatz
		reprendedors retener
		no volrai mon car saber,
	20	que no sia prezentatz,
		quan levaran en cadeyra,
		per fina valor enteira,
		lo pro comte de Rodes, en Enric,
		per cuy anc hom luy lauzan no mentic.
IV	25	Mas er es us temps, qu’assatz
		trob’ om, qui ditz mal saber,
		e enueg e non dever
		a quascus de so quel platz;
		e qui chanso vertadeira,
	30	fai de razon drechureira,
		non l’es grazit tan cum son crit mendic,
		don joys e chans e pretz prendon destric.
V		E non deu esser blasmatz,
		qui lauza so don ditz ver,
	35	ans lin deu hom grat saber,
		quan lauza so qu’es vertatz;
		mas qui lauzor ufaneira
		fai de razon messongeira,
		be lon deu hom blasmar e far enic,
	40	non per mi dons lauzar, qu’anc no falhic.
VI		Si de la vilhassa neyra,
		qu’espaventalh de faveyra
		semblas layssa nostre coms, tug em ric,
		e de maldir de ma gensor se gic
VII	45	Na Biatritz a maneira
		de Lunelh tan plazenteira,
		que tug aquilh son siey coral amic,
		que la vezon, tan gen dieus l’acomplic.