Eichelkraut, Franz. Der Troubadour Folquet de Lunel. Berlin: W. Weber, 1872

Code: 154,007 Auteur: Folquet de Lunel Genre: Canso mariana Numero: VI

Tant fin’ amors totas horas m’afila

I	1	Tant fin’ amors totas horas m’afila
		ma voluntat, qu’ieu de lauzar m’afil
		mi dons qu’en re tan mais no s’asubtila
		mos cars sabers, qu’ieu non ai ta subtil,
	5	que pogues dir l’una part de las mil
		lauzors, qu’om pot de lieys dir, que d’ans mil a
		no nasqueth homs lo pogues, non dic guil,
		ni lunhs per lieys lauzar non pot dir guila.
II		Si quon virtut natural el sa fil a
	10	loriental plus quen autre sa fil,
		val mai mi dons qu’autra dompn’a gentil a —
		mor ben amar a fin aman gentil,
		e dic vos be, qu’anc, depos qu’ieu sentil
		fin pretz de lieys e dins mon cor senti l’a —
	15	mor, qu’ieu li port, no fi cauza sotil
		si quon denant, tant me desasotila.
III		Mi dons es tals que franc cor e humil a
		verayamen a fin aman humil,
		quan lo troba lial, non en re vila,
	20	que no s’azaut j a de far cauza vil;
		tant es d’onrat luec e de senhoril
		que part totas dompnas pretz senhoril ha,
		sitot nos te qui la prega de suil,
		ans selh, que non la prega, mot per suil ha.
IV	25	E qui bon’ art e belh’ e maestril ha,
		per far obra be fort e maestril,
		que la vuelha far frevol e fragil, a,
		mout tenc per fol son sen e per fragil;
		aitals suy ieu estatz mas aqui vil
	30	que vi mon dan e que de mi dons vi la
		fina valors mi perdeus lun ca pil
		obrar d’obra, que del joy d’amor pil’a.
V		Coms de Rodes, car senher, ab gentil
		pretz mantenetz valor e de gentil a —
	35	mor ben amatz ma gensor, on portil
		lauzor de vos e luenh e pres porti la.
VI		Al bon senhor de Mercuer, qu’es el fil
		de valen pretz, que nos romp nis desfila,
		chansos, vai dir, qu’ieu no truep qui s’apil
		mielhs e fina valor, qu’elh si apila.