Appel, Carl. Poésies provençales inédites tirées des manuscrits d’Italie (Suite). "Revue des langues romanes", 39 (1896), pp. 177-216

Code: 349,001 Auteur: Peire Milo Genre: Canso Numero: [V]

Aisi m'aven com cel qui segnor dos

I	1	Aisi m'aven com cel qui segnor dos
		serv per tosttenps ni no·n a ghierdos,
		e de ben far envas lor s'afortis,
		e çascun iorn son plus contrarios.
	5	hai! per qe·l fan? za comanda razos:
		cel qui ben fai, deu ben trobar amis.
II		Ben posc esser d'una ren doloros:
		qar anc d'amor non fui aventuros
		ni ne domna, e 'nvas lor sui aclis.
	10	com en servir met plus m'entencios.
		eu mai li trob vas mi plus airos,
		ni non faz ren que a lor abellis.
III		Ara vei eu qe rason chai en ios
		e qe orgoil poza, sens fallizos,
	15	pois qe·l servir del tot se relenqis
		e qe·l benfaig e del tot nuallios,
		quant hom merces demanda sens caiso
		e perdon qer d'aisso qe non failis.
IV		Pois que no·m val merces, dreig ni raxos,
	20	servir, ben far, esser fiçels ni bos,
		pauc mi valgra s'eu sui fel ni enis.
		pois q'aisi es qar non trob garisos,
		plor e sospir et estauc tenebros,
		et enaisi viurai trosc'a la fis.
VI	25	Be·m meravil, qui anc no fon ioios
		e senpr estai mariz et angoisos,
		com po viure, qi d'amor non iois
		ni no·n aten ni bel diz ni bel dos?
		que si m'a fagh la bella de cui sos,
	30	sens colp de fust m'a mort e m'a conqis.
VII		Hai Deus, que non posc esser amoros
		della bella que·m fai star tant iros!
		mas quan ie vegh sa bocha e son cler vis,
		al cor mi toca una tal passios
	35	con la poges baisar! - per fin'amors,
		no sai qu'eu dic, tam son mei enemis.
VIII		Zançon, . . . . . . ., que no·n plaz autre mis
		e va t'en tost a la bella de cui sos,
		e dig li ben q'eu mor de l'amor sos
		si eu no bais li sos clers oillz voltis.